တခါတလေမှာဟာသက
ရင်နာနာနဲ့ ရယ်စေသတဲ့
ငှက်ကလေးနဲ့သစ်ပင်ကြားမှာ
အဲ့လို ဟာသမျိုး အများကြီးရှိတယ်
သစ်ပင်အတွက်ပါ
ငှက်ကလေးအတွက်ကတော့ မသိလိုက်မသိဘာသာ
ကျော်ဖြတ်သွားမယ့်ဟာသမျိုး
သစ်ပင်အတွက်ကတော့
မျက်ရည်နဲ့ရယ်နေရမယ့် ဟာသမျိုးလေ။
(၁)
သစ်ပင်လေးတစ်ပင်ဟာ တိတ်ဆိတ်ငြိမ်သက်မှုတွေကို အပိုင်ယူရင်း အမှောင်ထဲကနေ ငှက်ကလေးတစ်ကောင်ကို ငေးကြည့်နေမိတယ်။ငှက်ကလေးနဲ့ သူ့ကြားမှာ ခြားထားတာတွေဟာ အမှောင်နဲ့ လေထုတင်မကပဲ တချို့သောအရာတွေပါ ပါတယ်လို့ တွေးလိုက်မိတဲ့အခါ မရည်၇ွယ်ပါပဲ သက်ပြင်းတွေ ချလိုက်မိရဲ့။
ငှက်ကလေးရေ
မင်းငေးကြည့်နေတဲ့ ဘက်မှာ
ကိုယ်ရှိမလား
အဖြေသိရက်နဲ့
မေးမိတာလည်းအခါခါ
ငှက်ကလေးရေ
ကိုယ့်ချစ်ခြင်းကို စိတ်ရှုပ်တဲ့အခါ
ကိုယ့်ကောင်းကင်ကို
ဖယ်ခွါပါ။
(၂)
ငှက်ကလေးနဲ့ သစ်ပင်တို့ တွေ့ဆုံမှုက ဆန်းလွန်းတယ်။ မှားသွားတဲ့ဖုန်းနံပါတ်လေးတစ်ခုမှာ အသံချင်းချိတ်မိကြတဲ့ လူတွေလိုမျိုး သစ်ပင်က လက်တွေကို ဆန့်တန်းဖို့ပြင်နေချိန်မှာ အတောင်စုံတဲ့ ငှက်ကလေးက သစ်ပင်ရဲ့ လက်ဖျံမှာလာနားခဲ့တယ်လေ။ ဒီတွေ့ဆုံမှုမှာပဲ သစ်ပင်ဟာ ငှက်ကလေးကို လေးစားအထင်ကြီးမှုများစွာနဲ့ မြတ်နိုးသွားမိရဲ့။ သစ်ပင်သာ ငှက်ကလေးဖြစ်ခဲ့ရင် ငှက်ကလေးလို အတောင်အလက်စုံနိုင်ပါ့မလား လို့လည်း တွေးမိရဲ့။ ငှက်ကလေးဘက်ကတော့သစ်ပင် ဟာ သာမန်သစ်ပင်ငယ်လေးတစ်ပင်လို့ပဲ ယူဆမယ်ထင်မိတယ်။
ဟုတ်ပါတယ်။ ငှက်ကလေးအတွက်တော့သစ်ပင်နဲ့တွေ့ဆုံမှုဟာ သာမန်တွေ့ဆုံမှုပဲ ဖြစ်ခဲ့တယ်။
(၃)
ငှက်ကလေးရေ
အချစ်က ပူလောင်သတဲ့လား
တစ်ခါ ချစ်ဖူးတော့ပျဉ်ဖိုးနားလည်တဲ့ မင်း က
ဒီစကားပြောတာ မဆန်းဘူးကွယ်
ကိုယ့်အတွက်တော့
အချစ်ဟာ အညိုရောင်သမ်းပေမယ့်
အေးမြတဲ့အရာ
ဟုတ်တယ် ငှက်ကလေးရေ
ငှက်ကလေးကို ချစ်ခွင့်ရခြင်းမှာ ကိုယ်ဟာ
အလွမ်းကြောင့် နှလုံးသားက အညိုရောင်ပြောင်းတယ်
ဒါပေမယ့်လည်း စိတ်တစ်ခုလုံးအေးချမ်းတယ်။
ငှက်ကလေးတစ်ခါ ပြောဖူးတာ သစ်ပင်သတိရတယ်။ အချစ်က ပူလောင်တယ်တဲ့။ ငှက်ကလေးက အချစ်ကို အရှုံးအနိုင်သွားတွက်လို့ ပူလောင်တာဖြစ်မယ်။ သစ်ပင်အတွက်တော့ အချစ်ဟာ အချစ်ပါပဲ။ အချစ်ဆိုတာကို အဓိပ္ပါယ်ဖွင့်ဆိုဖို့ မကြိုးစားတဲ့အခါ အချစ်ရဲ့ အဓိပ္ပါယ်ဟာ ငှက်ကလေးဖြစ်လာတယ်။
အချစ်ဟာ သစ်ပင်အတွက်တော့ ခြောက်သွေ့လွန်သွားတဲ့ သစ်ရွက်လေးတွေလို အညိုရောင်သမ်းပေမယ့် အေးမြတဲ့အရာ။ ဟုတ်တယ်။
ငှက်ကလေးကို ချစ်မိတဲ့ အချစ်တွေက ငှက်ကလေးအကြောင်းအချိန်ပြည့် တွေးမိစေတယ်။ ငှက်ကလေးအကြောင်းအတွေးတွေဟာ ပိုင်ဆိုင်ခွင့်မရတဲ့ အကြောင်းအရာဖြစ်နေခဲ့တာတောင်မှ ရင်ကို ငြိမ်းအေးစေတယ်။
ငှက်ကလေးရေ သစ်ပင်အတွက်တော့ အချစ်ဟာ ငှက်ကလေးပါပဲ။ ဒီထက် တိကျတဲ့အဖြေတောင်ဒီလောက်မတိကျတော့ဘူး။
(၄)
ငှက်ကလေးရေ
တိတ်ဆိတ်နေတဲ့ ငှက်ကလေးက
ကိုယ့်အတွက်
ကြေကွဲနေတဲ့ မင်းသားလေးတစ်ပါး
ပြုံးရီနေတဲ့ငှက်ကလေးက
ကိုယ့်အတွက် ပျော်ရွှင်နေတဲ့ ဘုရင်ကြီးတစ်ပါး
ငှက်ကလေးရေ
အချစ်က ထူးဆန်းတယ်
ပိုင်ဆိုင်ဖို့ မလွယ်မှန်းသိလေလေ
ပိုမြက်နိုးလေလေတဲ့လေ
ကိုယ်က ငှက်ကလေးကို သက်ဆုံးထိ မြတ်နိုးမယ့်သူဆိုတာ
တဖြည်းဖြည်း သေချာလာခဲ့ပြီ။
ငှက်ကလေးက ရံဖန်ရံခါမှာ တိတ်ဆိတ်နေတတ်တယ်။ အဲ့ဒီအချိန်မှာ သစ်ပင်ဟာ ငှက်ကလေးကို အကြောင်းမဲ့ သနားနေမိတယ်။တခါတရံ ငှက်ကလေးပျော်နေတဲ့ အချိန်တွေမှာ သစ်ပင်ဟာ ငှက်ကလေးရဲ့ အပျော်တွေကို ငေးနေမိရင်း သူပါ လိုက်ပျော်နေမိတယ်။
အဲဒီနေ့ကပေါ့။ အချစ်ကိုကြောက်တဲ့ ငှက်ကလေးဟာ ငှက်ကလေးတစ်ကောင်ကို ငေးမောနေခဲ့တယ်။ သစ်ပင်ရဲ့ ရင်ဟာ ဗြန်းခနဲ ကွဲထွက်မတက် အထိတ်တလန့် ခံစားလိုက်ရတယ်။
ဒါပေမယ့်လည်း ငှက်ကလေးကို မြတ်နိုးမှုဟာ ဖြေလျော့ဖို့ မလွယ်တော့ဘူး။ ဒီကြိုးဟာ တဖြည်းဖြည်း တင်းကျပ်လာတာ သေရာပါမယ့်ထိဆိုတာ သစ်ပင်အတွက် သေချာနေခဲ့ပြီ။
ငှက်ကလေး ရေ ချစ်တယ်ဟာ.. လို့ ရေရွတ်မိတတ်တာ သစ်ပင်လေးရဲ့ ညနေခင်း တေးသံ။ ငှက်ကလေးရေ သတိရတယ်ဟာ.. လို့ ရေရွတ်တတ်တာဟာ ငှက်ကလေးရဲ့ ညခင်းတေးသံ။ ငှက်ကလေးရေ လွမ်းလိုက်တာ လို့ ရေရွတ်မိတတ်တာကိုက မနက်ခင်းနိုးထဟန်ပါပဲ။
ဒီလိုနဲ့ပေါ့ ။ သစ်ပင်လေးတစ်ပင်ဟာ ငှက်ကလေးတစ်ကောင်ကို ချစ်မိမှန်း တိတ်တိတ်လေး ဝန်ခံနေခဲ့တယ်။ ကမ္ဘာလောကကြီးကို။
(၅)
သူမမြင်မသိပေမဲ့
စိတ်ထဲမှာအမြဲငြိတွယ်
ပုန်းကွယ်ရန်ခက်ပေမဲ့
မလုံ့တလုံလေး ဖုံးပါဦးမယ်
သံယောဇဉ်အမျှင်တန်းမှုလေးတွေဟာ
တစွန်းတစများ သိသာစေခဲ့ရင်
သစ်ပင် ရင်ကွဲရချေရဲ့
သိသာသိ မမြင်မိယောင် ဆောင်ပေးမလား
ငှက်ကလေးရေ တောင်းဆိုမိချင်သေးရဲ့။
ရံဖန်ရံခါ ရေးမိတဲ့ ကဗျာတွေမှာ ငှက်ကလေးနဲ့ သစ်ပင်အကြောင်း တစွန်းတစဖေါ်ပြထားမိတတ်တယ်။ အဲ့ဒီကဗျာတွေကို ဖန်မိခဲ့ရင် သစ်ပင်တစ်ပင်ရဲ့ စိတ်ဟာ ဘယ်လောက်ထိ ကလေးဆန်လဲ မတွေးနဲ့ ငှက်ကလေးရေ။ တကယ်ဆို ချစ်မိသွားလို့ ကလေးဆန်တတ်ခဲ့တာ။ တခါတလေလည်း တွေးမိသေးရဲ့။ ကောင်းကင်တစ်ခုအောက်မှာ အသက်ရှင်နေထိုင်သူတွေချင်းတူတူ သစ်ပင်ကိုများ ငှက်ကလေး သတိထားမိလေမလားလို့။
တခါတခါကျပြန်တော့ ငှက်ကလေးဟာ ကိုယ့်သံယောဇဉ်အစွန်းအစတွေကို များ တွေ့သွားလေမလား စိုးထိတ်မိသေးရဲ့။
ငှက်ကလေးရေလို့ တမ်းတနေတတ်တဲ့စိတ်ကို သိမ်းဖို့ သစ်ပင်ကြိုးစားနေတယ်။တကယ်လို့များသတိထားမိခဲ့ရင် ငှက်ကလေး စိတ်ရှုပ်ရှာမယ်ဆိုတဲ့ အတွေးနဲ့ပါ။
ငှက်ကလေးရေ ဒီအလွမ်းတွေသိမ်းဖို့ ကြိုးစားနေတဲ့ သစ်ပင်ကို ခဏလောက်မမြင်ချင်ယောင်ဆောင်ပေးပါ။
ရည်ဝေ
No comments:
Post a Comment
မင်္ဂလာပါ စာတွေ လာဖတ်ပေးလို့ ကျေးဇူးပါနော်