တစ်နေ့မှာ..

“တစ်နေ့မှာ”

ပွဲတော်သည် အလင်းများပြန့်ကြဲစွာဖြင့် လင်းလက်လှပလွန်းနေသည်။ ပွဲတော်ကို ရောက်လာရာလမ်းသည် ရွှေ၊ငွေ၊ ကျောက်သံပတ္တမြား ခင်းမထားပါ။ ပွဲတော်သို့လာရာလမ်းသည် အနည်းငယ်ကြမ်းရှရှနိုင်သော သဲတို့ ဖြန့်ခင်းထားပြီး ဖိနပ်မပါခြေဗလာများဖြင့် လာသူများသည်ကိုတော့ သတိထားမိသည်။ မည်သို့ပင်ဖြစ်စေကာမူ ပွဲတော်သည် ကြီးကျယ်ခမ်းနားစွာ လင်းလက်လှပနေသည်ကတော့အမှန်ပင်ဖြစ်သည်။

အပြုံးသည် ပွဲတော်အတွက် တည်ခင်းဧည့်ခံသည့် အစာအာဟာရဖြစ်သည်ဟု ဆိုချင်သည်။ နေရာတိုင်းတွင် ရှိနေသော အပြုံးတို့သည် လာပါ၊ ယူပါ၊ ပြုံးလှည့်ပါဟု ခေါ်ငင်ဟန်ရှိ၏။ ပွဲတော်ရှိလူအများသည် ရုပ်သေများသဖွယ် ပြုံးချိန်တန်ပြုံးဖို့မှတ်ဥာဏ်အသွင်းခံထားရသည့် သဏ္ဍန်ဖြင့် အသက်မဲ့အပြုံးကို တန်ဆာဆင်ထားသလိုရှိသည်။ ပွဲတော်တွင်ရောက်လာသူများ၏ ထူးခြားချက်မှာ တာဝန်နှင့် လေးစားမှု ဆိုသည်ကို ဦးခေါင်းတွင် ချိတ်ဆွဲထားခြင်းပင်ဖြစ်သည်။

အပိုင်း(၁)

ပွဲတော်၏ လှုပ်ရှားမှုမှန်သမျှသည် ပုံသေကားချပ်ဆန်လွန်းလှ၏။ ပွဲတော်ကို အခမ်းအနားမှူးတစ်ယောက်၏ အသက်မဝင်သည့် လေသံနှင့်  နှုတ်ခွန်းဆက်စတင်ထားသည်။ ပွဲတော်သို့ သီးသန့်လာရောက်သူများအပြင် ပွဲတော်ကြီးမှူးကျင်းပရေးကော်မီတီ၊ ပွဲတော်တွင်းလှုပ်ရှားမှုမှန်သမျှ ကြည့်ရှုရေးကော်မီတီ စသဖြင့် ပွဲတော်တွင်း အဖွဲ့ငယ်များဖွဲ့ထားပြန်သေးသည်။ ထို့ကြောင့်ပင်ပွဲတော်သည် ပွဲတော်ထက် လွှတ်တော်အငယ်စားလေးနှင့်ပင် တူသွားသေး၏။

“ကျွန်တော်ကတော့ ကျွန်တော့်ဘဝကို စိုပြည်သာယာစေချင်တာပါပဲ ဒီအတွက် ဘယ်သူတွေက ဘယ်လို ကြီးမှုးစောင့်ရှောက်ပေးမလဲ သိချင်တယ်”

အစိမ်းရောင်ကို အတော်ပင် နွမ်းသွေ့နေသည့် အရောင်ကိုဝတ်ဆင်ထားသော တောင်တစ်လုံးက ထ၍ အဆိုပြုသည်။ အစိမ်းခြောက်ရောင်ဟု ခေါ်ဆို၍ ရနိုင်မည် ထင်၏။

“ဘယ်သူတွေက ခင်ဗျားရဲ့ စိုပြည်မှုကို ဖျက်ဆီးလိုက်တာလဲကော မသိချင်ဘူးလား”

မခမ်းတခမ်းမြစ်တစ်စင်း၏အသွေးအသားကိုငုံထားသော ရေသန့်ဘူးတစ်လုံး၏ အမေးကို တောင်ကြီးက မသိကျိုးကျွံပြုနေသည်။ သူ့ကို ဖျက်ဆီးမည့်သူများသည်ပင် သူ့ကို ထိန်းသိမ်းစောင့်ရှောက်ပေးမည့်သူများဖြစ်သည် ဟူသည့်အဖြေကိုတောင်ကြီး သိပါ၏။ ထို့အတွက်ပင် တောင်ကြီး မဖြေချင်၊ မဖြေရက်၊ မဖြေဝံ့ပါ။

အတင်းပြောခြင်းဝါသနာ

စိတ်ကြီး စိမ်းသက်နေသည်။ တဆစ်ဆစ် ကိုက်ခဲနေသည့် ဦးခေါင်းသည် စိတ်ကြီး၏ စိမ်းသက်မှု ဒဏ်ကို မခံနိုင်တော့သည်မို့ မျက်လုံးအစုံကို မှိတ်ကာသာ အိပ်ပစ်ချင်စိတ်တို့ ပေါက်နေရသည်။ သို့သော် စိတ်၏ ထိန်းချုပ်မှုအောက်မှ သူ လွတ်မထွက်နိုင်။ စိတ်ပြေးရာ သူ လိုက်နေရသည်။ စိတ်သွားရာ သူပါ နေရသည်။ စိတ်ကြီး စိမ်းသက်နေသည်မို့ သူ့တွင်လည်း အစိမ်းရောင်များ စွန်းထင်းနေတော့သည်။
“ဘာတွေ လုပ်နေတာလဲ ခု ဘာတွေ လုပ်နေတာလဲ”
ဘာ့ကြောင့် မေးခဲ့မိသလဲဟု ကိုယ်ကိုယ်တိုင်လည်း မသိ။ သို့သော် ထိုမေးခွန်းက ကိုယ့်ကို နှိပ်စက်နေသည်မှာ အချိန်အတန်ကြာပြီ။

၎ ဂဏန်းနှင့်စိတ်နင်စာ

“၄ ဂဏန်း နှင့် စိတ်နင်စာ”

နံပါတ် ၄ သည် ကျွန်တော်မုန်းတဲ့ ဂဏန်းမှာပါလာပြီဖြစ်၏။ ဘာ့ကြောင့်ဘာ့အတွက် ဟု မစွပ်စွဲလိုပါ။ နံပါတ် ၄ သည် ကျွန်တော့်ကို ဒဏ်ရာ တစ်စုံတစ်ရာ ပေးခဲ့သည်ကတော့ သေချာနေပါသည်။
မွေးခုနှစ် ၁၉၈၆။ မွေးလ ဇွန်။ မွေးရက် ၂၈။
၎ နှင့်ပတ်သတ်သည့် ဂဏန်းတစ်စုံတရာ မပါဝင်ခဲ့ပါ။ သို့သော်၎ ဂဏန်းသည် ကျွန်တော့်ကို နှိပ်စက်လွန်းနေ၏။
မျှော်လင့်ခြင်းကို စိတ်နင်စာ ဟုသတ်မှတ်ချင်ပါသည်။ ကျွန်တော့် စိတ်ကြီး အပြာရောင်ဆန်စွာ နင်နေ၏။ ၁၃၊ နိုဝင်ဘာ၊ ၂၀၁၃၊ ည ၁၀း၂၃ ။ မျှော်လင့်နေသော ဖုန်းလေးတစ်စင်းသည် ကျွန်တော့်ဆီ ရောက်မလာခဲ့ပါ။ ကျွန်တော် အပြာရောင်ဆန်စွာ တိတ်ဆိတ်နေမိပါသည်။

“မိစ္ဆာစီးနင်းခံ ည” (ဝါ) “အမှောင်ငတ်သူ….”

“မိစ္ဆာစီးနင်းခံ ည”

(ဝါ)

“အမှောင်ငတ်သူ….”

အရောင်တွေ မည်းနက်နေသည်လား။ အမည်းရောင်တွေလေပဲလား။ အမြင်အာရုံတစ်ခုလုံးသည် အမည်းရောင်၏ ဖုံးအုပ်ထားမှုအောက် ကျရောက်နေသည်။

“အရောင်တွေဆာလိုက်တာ”

ရေဆာသည်ဆိုသည့် ခံစားချက်လိုပင် သူယခု အရောင်တွေ ဆာနေသည်။ ကြည့်လေရာမြင်လေရာတိုင်းသည် အမည်းရောင်။ ပိန်းပိတ်အောင် ထူထပ်နေသည့်အမှောင်မဟုတ်။ အမှောင်အုပ်ဆောင်းအောက် ကျရောက်နေသည့် ကြက်တစ်ကောင်ပမာ ခံစားနေရသည်။ အောက်အီးအီးအွတ်ဟု ကြက်ကအော်လျှင် လူအများက ကြားနိုင်သေးသည်။ သူသည်ကော။ ဒီအမည်းရောင်အုပ်ဆောင်းအောက်က လွတ်ဖို့ ဘယ်လိုအော်ရမလဲ ဟု အပြင်းအထန်စဉ်းစားနေမိသည်။

ငှက်ဆိုသည်မှာ ပျံရင်းသေ၊လူဆိုသည်မှာ ကြံရင်းသေသတဲ့။ ရှေးခေတ်စာပေမှာ ဖတ်ခဲ့ဖူးသည်။ ယခု သူ အမည်းရောင်အုပ်ဆောင်းအောက် မနေချင်သည့်အတွက် ကြံစည်ရပေတော့မည်။ သူက လူကိုး။

……………..

“အရောင်တွေ ဆာလိုက်တာ”

“ပန်းခရေ မဖြစ်လိုသော ......”

ဖုန်း နံပါတ် တစ်ခုသည် တိခနဲ ဖြတ်တောက်ခံလိုက်ရ၏။ ကွန်တက်လစ်(စ်)(contact list) တွင် မှတ်မထားမိသောကြောင့် ဦးနှောက်တွင် ရေးရေးမျှ မကျန်ရစ်ခဲ့။

သူသည် သူဖြစ်သည်။ သူသည် သူ ဖြစ်၏။ သူသည် သူသာ ဖြစ်သည်။

မေ့ထားဖို့ လိုအပ်သော အကြောင်းတရားများစွာ ပေါ်လာပြီဖြစ်သည်။ နေကြာပန်းတို့မည်သည် နေမင်းပျောက်ကွယ်သည့်အခါ မှေးမှိန်ဖျော့တော့လျှက် ခေါင်းငိုက်စိုက်ကျရမြဲသာ ဖြစ်၏။ ထို့အတူ ကိုယ်သည်လည်း ပြန်လှည့်မလာသည့် ချစ်ခြင်းတရား၏ အတိမ်အနက်တွင် ခေါင်းငိုက်စိုက်၍ ကျန်ခဲ့ပြီဖြစ်သည်။

မြေပေါ်တွင် အုပ်စုဖွဲ့နေထိုင်ကြသော မြက်ခင်းလေးများကို မြင်မိပါသလား။ မြက်ပင်လေးများတွင် မြက်ပန်းလေးများရှိ၍ အသီးလေးများသီးနေကြသည်။ မည်သို့ပင် လူတို့၏အနင်းကို ခံခဲ့ရစေကာမူ ပြန်လည် ထောင်မတ်လာတတ်သည်သာဖြစ်သည်။

“ဝက်ကလေး ပျော်ပါစေ”

ဝက်ကလေးကို ချစ်မိတာ ဘယ်က စခဲ့လဲ မသိဘူး။ ဒါပေမယ့် ချစ်မိတာကတော့ သေချာနေပါပြီ။ ဝက်ကလေးက နားရွက်ဖါးဖါးလေးရှိတယ်။ နောက် အရပ်မြင့်တယ်။ ထူးခြားတာကတော့ ကိုယ့်ခန္ဓာကိုယ်ထက် သုံးဆလောက်ဝနေတဲ့ ခန္ဓာကိုယ်ပါပဲ။ ဟုတ်တယ်။ ဝက်ကလေးဆိုတာ ကိုယ်ချစ်စနိုးခေါ်တဲ့ နာမည်လေး။ သူက ကိုယ့်လို လူသားလေးတစ်ယောက်ပေါ့။

“ပွဲတော်နှင့် ဝေးရာ……”-ပြင်ဆင်ချက်

တစ်စုံတစ်ရာကို ရှာဖွေဖို့ သူ ဒီနေရာကို ရောက်နေခဲ့သည်ဟု သတိရသည်။ ထိုတစ်စုံတစ်ရာသည် ဘယ်အရာဖြစ်သည်ကိုတော့ သူကိုယ်တိုင် မသိ။ မှောင်မိုက်တိတ်ဆိတ်နေသော လမ်းကြားလေးကတော့ မည်သူလာလာ အေးစက်စက် ဆီးကြိုနေဟန်ရှိ၏။ သူ့ဘေးတွင် တချို့လူတို့ ရပ်၍ တချို့လူတို့ သွားလာနေကြသည်။ လမ်း၏ အရှေ့ကိုသွားရမလားအနောက်ကိုသွားရမလား ဟု တွေးရခက်လွန်းသောကြောင့် သူမေးလိုက်မိသည်။
“ဘယ်ကိုသွားရမလဲ”
မကြားဟန်ရှိသည်။ သူ့ဘက်သို့ မျက်နှာလေးသော်မျှ လှည့်မလာခဲ့။
“ဘယ်ကိုသွားရင် ကျွန်တော် ရှာဖွေတဲ့အရာနဲ့ နီးစပ်မလဲ”
“ဘယ်ကိုသွားရမလဲ”

“ကလုန်း များ ပျော်သည့် ကစားပွဲကို ဘဝဟု ခေါ်သည်”

မှောင်သည်။ အမှောင်တို့ ကြီးစိုးလွန်းလှသည်။ ကိုယ့်ကျောတွင်တပ်ဆင်ထားသော ကြိုးများကြောင့် ရံဖန်ရံခါတွင် သွေးစိမ်းရှင်ရှင်ထွက်သကဲ့သို့ရှိသည်။ ကိုယ့်ရှေ့တူရှုတွင် ဘာရှိလဲ တွေးခွင့်ပေးသင့်ပါသည်။ ခုတော့အလင်းပျပျပင်ကျမလာခဲ့။ အမှောင်သည်  မြင်နိုင်စွမ်းရှိသင့်သည့်အရာမှန်သမျှအား ထိန်းချုပ်ထားသည်။
ကလုန်း ဆိုသည့်စကားအဓိပ္ပါယ်ကို မုန်းလှသည်။ ကိုယ် ကလုန်းမဖြစ်ချင်ပါ။ သို့သော် ကိုယ့်ကို ကြိုးဆွဲကာ လိုရာကနေသော ဇာတ်ဆရာညွှန်ရာအတိုင်း ကလုန်းဖြစ်နေရသည်။ ကိုယ်သည် ကိုယ်မဟုတ်တော့။ ကိုယ်သည် ကလုန်းတစ်ကောင် ဖြစ်နေသည်။
ကိုယ့်စိတ်၊ ကိုယ့်နှလုံးသားသည် ဖြစ်သင့်သလို အခြေအနေတစ်ခုအတိုင်း ဖြစ်ခဲ့သည် ဆိုပါစို့။
သို့ဆိုလျှင်ဖြင့် ကိုယ့်ခံစားချက်သည် အမှန်တကယ် ခံစားချက်အစစ်အမှန်လား။ ဖြစ်သင့်ဖြစ်ထိုက်၍ ဖြစ်လာရသော ခံစားချက်လား။ မှောင်သည်။ အတွေးထုကြီးက မှောင်လှသည်။

စာရေးဆရာမအပျိုကြီး၏တစ်နေ့တာ

“အချစ်ဟာ ဘဝကို ထိန်းချုပ်ပဲ့နှင်ပေးတဲ့ အရာ မဖြစ်သင့်ဘူး လမ်းလွဲလိုက်မှာစိုးလို့ ဘေးကနေ တစ်ချက်တစ်ချက်မှာ ထိန်းမတ်နိုင်တယ် ဆိုတဲ့ အနေအထားပဲရှိသင့်တယ်။ တကယ်ဆို အချစ်ဟာ စိတ္တဇနာမ် သက်သက်ပဲ သူမရှိလည်း အသက်ရှင်လို့ရတာပဲ”

ရုပ်သေးရုပ်ပွဲတော်

“ရုပ်သေးရုပ်ပွဲတော်”

တိတ်ဆိတ်မှောင်မိုက်နေသော လမ်းကျဉ်းလေးဝယ် ထိုင်နေသူအများအပြားရှိပါသည်။ သူတို့သည် မျှော်လင့်ခြင်းကြီးစွာဖြင့် ကောင်းကင်ဆီသို့မော့ကြည့်နေကြသည်။ ထိုတိတ်ဆိတ်မှောင်မိုက်နေသော လမ်းလေးမှာပင် လှုပ်ရွနေကြသူများလည်းရှိပါသည်။

“ဘယ်တော့လာမှာလဲ”

“ဘယ်တော့လာမှာလဲ”

တိုးသဲ့သဲ့မေးသံများသည် တိတ်ဆိတ်ခြင်းကို ရံဖန်ရံခါ ဖေါက်ထွက်လာကြ၏။ သို့သော် ထိုမေးခွန်းသည် မေးခွန်းသာဖြစ်လျှက် အဖြေမရှိ။ အဖြေမရှိခဲ့။

လမ်းကျဉ်းလေးဝယ် အလင်းတချို့ စိုက်ခနဲ စိုက်ခနဲ ကျလာသည်။ ထိုအလင်းတို့အား လိုက်ဖမ်းနေကြ၏။ ကိုယ့်ဘေးနားသို့ အလင်းကျလာပါလျှက် မမြင်ကြသူတွေကလည်း အများအပြား။

“မလာသေးဘူးလား”

“ခုထိ မလာသေးဘူးလား”

“မျှော်ရတာ ပင်ပမ်းလှပြီ”

လူတချို့၏ တီးတိုးရွတ်ဆိုသံသည် သိပ်မကျယ်လောင်တော့။ အလင်းဖမ်းသူအများအပြား၏ လှုပ်ရွသံသည်သာ ဖုံးလွှမ်းသွား၏။

“ဟော ဟိုနားမှာ ဟေ့”

“ဒီမှာဟ ဒီမှာ”

……………………………..။

 “အလင်းရှင်သည် အမှောင်ကို ခွင်းဖို့ကြိုးစားသော်ငြား လူသားတို့၏ စာနာမှုမရှိခြင်းကို တွေ့မြင်ရသောကြောင့် အမှောင်ကိုမခွင်းပဲ ကောင်းကင်ထက်သို့ ပြန်သွားလတံ့”

ရုတ်တရက် ကြားလိုက်ရသော စကားသံကြောင့် အလင်းဖမ်းသူများကော၊ အလင်းကို မမြင်ရ၍ တိတ်ဆိတ်နေကြသူများပါ ရုတ်တရက် လန့်ဖျပ်သွားကြသည်။ ဒီအမှောင်ကို မခွင်းနိုင်တော့ဘူးလား ဆိုသည့် မေးခွန်းများစွာတဝဲလည်လည်ဖြင့် အသံရှင်ကို လိုက်ရှာနေကြ၏။ သိပ်မကြာခင်မှာပင် အသံရှင်ကို အမှောင်ပျပျတွင် တွေ့လိုက်ရ၏။

ယပ်တောင်တစ်ချောင်းကို ကျောတွင်စိုက်လျှက် လက်တွင်တော့ ဓါတုဆေးများဖြင့်ပြုလုပ်ထားသည့် မီးလင်းလက်ကောက်များ ဝတ်ဆင်ထားသည့် လူတစ်ယောက်။ ထိုသူ့သဏ္ဍာန်ကို ကြည့်ရုံမျှဖြင့် စိတ်မနှံ့ဟု သိသာနေသည်။ သို့သော် လူအားလုံး မလှုပ်ရဲဘဲ တိတ်ဆိတ်ငြိမ်သက်စွာ တွေးတောနေကြသည်။

သဘင်သည်စကား၊ အရူးစကား၊ ကလေးစကားတို့ကို မျက်နှာလွှဲခဲပစ်မလုပ်သင့်ဟူသည့် ရှေးက ချန်ထားခဲ့သည့် စာသားကို တွေးးတောနေကြသည်။ သို့ဆိုလျှင်ဖြင့် ဒီအရူး၏ စကားကို သေချာစဉ်းစားသင့်သည် ဟု တွေးသူ အများအပြားရှိသလို တချို့ကလည်း စိုက်ခနဲစိုက်ခနဲကျလာသော အလင်းများအား ကောက်ယူဖို့ ချောင်းမြောင်းနေကြပြန်၏။

ထို့နောက် ထိုစိတ်မနှံ့သူက လမ်းကျဉ်းလေးတွင်ပင် ရပ်လျှက် အလင်းစများအား ကောက်ခါငင်ကာဖြင့် လိုက်ကောက်နေပြန်သည်။ ထို့နောက် အလင်းရှာမတွေ့သူတချို့အား အလင်းစပေးလိုက် ကောက်လိုက်လုပ်နေသဖြင့် ကျန်သူတို့မှာ မတွေးအားတော့။ သူတို့ပါ အလောတကြီးလိုက်ကောက်ကြပြန်၏။ စိတ်မနှံ့သူပေးသော အလင်းကြောင့် လူတချို့သည်လည်းအလင်းကို ရှာဖွေနိုင်စွမ်းရှိလာပြန်သည်။

 “အလင်းတွေဝယ်ချင်ပါတယ် အလင်းတစ်စအတွက် အမိုးတစ်စိတ် နဲ့ လဲပါ့မယ်။”

ကြည်လင်ပြတ်သားသော အသံများကြောင့် လမ်းကျဉ်းလေးထဲမှ လူအပေါင်းသည် အသံလာရာသို့လှည့်ာကည့်လိုက်ကြ၏။ လူကြီးလူကောင်းပုံဝတ်ဆင်ထားသော အမည်းရောင် ကမ္ဗလာများထံမှ အသံထွက်လာခြင်းဖြစ်သည်။ အမိုးမရှိ၊ အကာမရှိ၊ အိမ်မရှိ၊ ယာမရှိ ဆိုသည့်နာမည်ဖြင့် လမ်းကျဉ်းလေးတွင် နေလာတာကြာပြီဖြစ်သော သူတို့အတွက်တော့ အမိုးတစ်စိတ်ဟူသည် ကြီးမားသည့် ဆွဲဆောင်မှုကြီးဖြစ်သည်။

စိတ်မနှံ့သည့်အရူးမှလွဲ၍ ကျန်သူများ၏ မျက်နှာတွင် အနီရောင်သမ်းလာသည်။ ထို့နောက် အလင်းကောက်ဟန်မှာ ကနဦးကလို ငြိမ်ငြိမ်သက်သက်မဟုတ်တော့ပဲ ပြေးခွကျော်လွှားကာ ကောက်နေကြသည်။ အလင်းမမြင်သူတချို့ကလည်း ကိုယ့်ဘေးနားမှာရှိလိုရှိငြား လက်ဖြင့် မှန်းသမ်းရမ်းကာ ကောက်ကြ၏။ ကံကောင်းသူတချို့ရှိသလို ကံဆိုးမြဲဆိုးနေသူလည်း ရှိသည်။

အရူးသည် ခေါင်းကို ဖြည်းဖြည်းလေးလေး ခါလိုက်ရင်း အမည်းရောင်ကမ္ဗလာများဆီသို့ တည့်တည့်လျှောက်သွားလေ၏။

“ဘာ့ကြောင့် အလင်းကို ဝယ်ချင်ရတာတုန်း”

“အရူးက အရူးလို နေစမ်းပါ”

“ဘာ့ကြောင့် အလင်းကို ဝယ်ချင်ရတာတုန်း”

အရူး၏ ထပ်မေးသံကြားတော့ အမည်းရောင် ကမ္ဗလာတစ်ခုက ဖြေသည်။

“သူတို့ဆီမှာ အလင်းတွေများရင် ကျုပ်တို့ အမှောင်တွေ အတွက် နေရခက်မှာပေါ့ဗျ အားလုံးစုစုစည်းစည်းနဲ့ အလင်းကို တူတူကောက်လိုက်ကြရင် အလင်းထုကြီးက ကျုပ်တို့ကို ဖယ်ထုတ်မှာလေ ခုလိုကျတော့ အမိုးတစ်စိတ်ဆိုပြီး တစ်ယောက်နဲ့တစ်ယောက်အလင်းကောက်ရင်း သူတို့စိတ်တွေ မသန့်ရှင်းတော့ဘူး တွေ့လား အဲဒီအချိန်ကျ အလင်းရှင်လည်း သှူုလူတွေရဲ့ စိတ်ညစ်ထေးမှုကိုကြည့်ပြီး အလင်းကို ပြန်ရုတ်သိမ်းလိုက်မှာပဲ အဲဒီအခါ ဒီကမ္ဘာက ကျုပ်တို့ရဲ့ ကမ္ဘာ ဖြစ်မြဲဖြစ်နေမှာပေါ့”

အရူးက ခေါင်းခါလိုက်သည်။ ထို့နောက် အော်ကြီးဟစ်ကျယ်ဆန်စွာ အော်ဟစ်လိုက်သည်။

“ကြားကြလား”

မည်သူမျှ သူ့ကို လှည့်မကြည့်

“ကြားကြလား”

တစ်ယောက်နှင့်တစ်ယောက် ခုန်ပျံကျော်လွှားကောင်းနေကြဆဲ။

“ကြား ကြ လား”

ထို့နောက်တော့ ခုန်ပျံကျော်လွှားသံများမှလွဲ၍ မည်သည့်အရာမျှ မကြားရတော့။ အသံမထွက်ပဲ အော်ဟစ်နေသည့် အရူးတစ်ယောက်နှင့် ခုန်ပျံကျော်လွှားနေသည့် လူစုကြီးသာ ကျန်ခဲ့တော့၏။ အမည်းရောင်ကမ္ဗလာများကတော့ ကျေနပ်စွာ လက်ပိုက်ငေးကြည့်နေကြဆဲ။

ထိုအချိန်မှာပင် အရူး၏ မျက်ဝန်းများ ရုတ်တရက်ပြုံးသွား၏။ ထို့နောက်တော့ ကျေနပ်စွာ ခေါင်းတငြိတ်ငြိတ်လုပ်နေပြန်သည်။ ထို့နောက် အမည်းရောင်ကမ္ဗလာများကို လက်ညိုးထိုးကာ ဟားတိုက်ရယ်မောပြန်၏။ သို့သော် အသံမထွက်။ အမည်းရောင်ကမ္ဗလာများကတော့ အရူးကို ကြောင်အစွာ ပြန်ငေးကြည့်နေကြသည်။

“ဒီအရူးတော့ စိတ်မနှံ့တော့ဘူးထင်တယ်”

“ကြည့်ရတာ ပိုပိုဆိုးလာတယ်ထင်ပ”

ထို့နောက် သူတို့၏ မျက်လုံးများကို အပြိုင်အဆိုင် အလင်းကောက်နေကြသော လူစုကြီးထံသို့ လွှဲလိုက်ပြန်သည်။

အရူးကတော့ သူတို့ကို ဟားတိုက်ရယ်မောရင်း

“အဖန်တီးခံအချင်းချင်း ဘာ့ကြောင့် တိုက်ခိုက်နေကြပါသလဲ” ဟု ရွတ်ဆိုကာ လမ်းကျဉ်းလေးထဲမှ ထွက်ခွာသွားတော့၏။

လူစုကြီးကတော့ အပြိုင်အဆိုင် အလင်းကောက်ဆဲ။ အမည်းရောင်ကမ္ဗလာများသည်လည်း ကျေနပ်နှစ်သိမ့်နေကြဆဲ။

ရည်ဝေ(လင်းရောင်ခြည်)