ငှက်ကလေးတစ်ကောင်အတွက်...၄ (ဝါ) ဆုံစည်းခွင့်ရှိလိမ့်မည်

ကျွန်တော့်ငှက်ငယ်အတွက် သစ်ပင်အဖြစ်မှ လွတ်မြောက်ဖို့ရာ ကြိုးစား၏။ မည်မျှပင်ရုန်းပစေ။ မြေကြီးထဲ နစ်ဝင်နေသော အမြစ်တို့ကို ဆွဲထုတ်ဖို့ရာမတတ်နိုင်တော့။ သို့သော်လက်မလျှော့နိုင်သေး။ ငှက်ငယ်လေးအတွက်၊ ငှက်ငယ်ဆီအရောက်သွားဖို့အတွက် ကောင်းကင်သို့ ပျံတက်ရန် အားအင်တို့ ဖြည့်ဆည်းဖို့ရာ ကြိုးစားနေပါသည်။
ဟိုးအဝေးတစ်နေရာဆီဝယ် ငှက်ငယ်လေးရှိနေပါသည်။ သူအားငယ်နေပါသလား။ သို့မဟုတ် သူဝမ်းသာနေပါသလား။ ကျွန်တော် မသိပါ။ သို့သော် သူ့အပါးသို့ သွားခွင့်မရှိတောင် အဝေးတစ်နေရာမှ ငေးကာကြည့်နေချင်သေးသည်။
(၁)

သူ ဒီချိန်ဆို ဘယ်နေရာသို့ ရောက်ရှိနေလေမလဲ။ ငှက်ဖြစ်ကာ ကောင်းကင်သို့ အရှိန်အဟုန်နှင့် ထိုးတက်လိုက်ချင်စိတ်တို့သည် စိတ်၌ တဖွါးဖွါးဖြစ်ပေါ်နေသည်။ ငှက်ငယ်သည် ဒီချိန်ဆို သူ့ငှက်ငယ်လေးနားတွင်ရှိနေလေမလား အသိက ရင်ကို ပူလောင်စေသည်။ အချစ်ဆိုသည်မှာ မမြင်ရသော အဆိပ်ခွက် ဖြစ်လေသလားမသိ။ ကျွန်တော့် လက်ဖျံတို့သည် အဝါရောင်သို့သမ်းလာချေပြီ။ ရွက်ဝါတို့သည်လည်း စိတ်မှ ခွင့်မပြုပါပဲ နှလုံသားမှ အလိုဆန္ဒကြောင့်ကဗျာတို့ ပိုက်ကာ တိမ်ပေါ်သို့ တစ်ရါက်ပြီးတစ်ရွက် တက်သွားချေပြီ။
“ခဏနေပါဦး။ငါ ကြိုးစားပါရစေဦး။ အမြစ်တွေကို ဆွဲနှုတ်ပြီး ကောင်းကင်ပေါ် ပျံကြည့်ပါရစေဦး။”
ကျွန်တော်ဆိုနေသည့် စကားတို့ကို သူတို့အလေးမထား။ ကောင်းကင်ဆီသို့ဦးတည်၍ ပျံသန်းသွားကြသည်။
ငှက်ငယ်သည် ကျွန်တော့်အတွက် အဆိပ်ခွက်ကို သယ်ဆောင်လာသူ ဖြစ်လေသလား။ သို့သော် မမုန်းပါ။ အချစ်သည် အဆိပ်ဟု ဆိုဦးတော့။ နူးညံ့ချိုမြခြင်းများစွာနှင့် သေဆုံးရခြင်းကို ကျွန်တော် နှစ်သက်ပါသည်။
ငှက်ငယ်လေးနှင့် ကျွန်တော် တစ်နေရာရာတွင် ဆုံစည်းနိုင်ပါလိမ့်မည်။ သေဆုံး၍ သစ်ခြောက်ပင်ဖြစ်နေပြီဖြစ်သောကျွန်တော့် ခန္ဓာကိုယ်ပေါ်ဝယ် ငှက်ငယ်လေး မျက်စိလည်လမ်းမှားကာ လာရောက်နားနိုင်ပါသည်။ ထိုအချိန်တွင် ရောက်ရာဘဝမှနေ၍ ငှက်ငယ်လေးကို လာကြည့်ချင်ပါသည်။ခုတော့ ငှက်ငယ်သည်ဘယ်ဆီဘယ်မှာမသိ။ လွမ်းသည့်စိတ်တို့က အခံရခက်လှသည်။ အချစ်သည်အဆိပ်ဟု ဆိုလျှင် အလွမ်းသည် အခါးအရသာကို ပိုမိုခါးအောင်ကူမပေးထားသောထောက်ပံ့ ပစ္စည်းဖြစ်ပေလိမ့်မည်။ သို့သော် ထိုအခါးအရသာကပင်လျှင် စွဲမက်ဖွယ်ကောင်းလွန်းလှသည်။ ငှက်ငယ်လေးအား လွမ်းနေရခြင်းကို ကျွန်တော် နှစ်သက်လှပါသည်။
အလွမ်းကြောင့် သေဆုံးသူရှိသည် ဟုဆိုလျှင် ထိုသူသည် ကျွန်တော်သာ ဖြစ်ပေလိမ့်မည်။
(၂)
ငှက်ငယ်လေးသည် တစ်ချိန်ချိန်တွင် ကောင်းကင်တစ်ခုလုံးအား အပိုင်သိမ်းကာ ဟိုဒီဝဲပျံပစ်ဖို့ စိတ်ကူးရှိသူဖြစ်သည်။ ငှက်ငယ်လေး၏ တွဲဘက်ကား ငှက်ငယ်လေးကဲ့သို့ပင် ငှက်လေးတစ်ကောင်ဖြစ်နေသည်မှာ အံ့သြစရာမရှိပါ။သို့သော်ကျွန်တော် မုန်းလွန်းလှသည်။ မယုံမရှိပါနှင့်။ သစ်ပင်တစ်ပင်တွင်လည်း မနာလိုစိတ်ရှိ၏။
ကျွန်တော်သည်လည်း ငှက်ငယ်လေး၏ တွဲဘက်ဖြစ်ချင်လှပါသည်။ သို့သော် ပန်းချီကားတွင်ဖြစ်စေ၊ ဓါတ်ပုံတွင်ဖြစ်စေ ငှက်သည် ကောင်းကင်နှင့်သာ လိုက်ဖက်၍ သစ်ပင်တွင်နားနေသောငှက်ကိုမူ ရိုက်ဖို့စိတ်မပါကြ။ ထို့အတူ ကျွန်တော် သစ်ပင်သည်လည်း ငှက်ငယ်လေး၏ တွဲဘက်ကောင်းမဟုတ်တော့။ အဘယ့်ကြောင့်ဆိုသော် ငှက်ငယ်လေးသည် ကျွန်တော့်လက်ဖျံတွင်နားရန် မေ့နေတတ်သောကြောင့် ဖြစ်၏။
ကျွန်တော်သည် ငှက်ငယ်ကို ချစ်သော သစ်ပင်ဖြစ်၏။
(၃)
ငှက်ငယ်လေးသည် ရံဖန်ရံခါ စကားလာဆိုတတ်သော်လည်း သူဆိုသမျှ စကားတိုင်းကို ကျွန်တော် အကောင်းမမြင်နိုင်ပါ။ သူစကားဆိုချိန်တိုင်းဝယ် သူနှင့် သူ့ငှက်ကလေးတို့ ကောင်းကင်ဝယ်ပျံသန်းခဲ့သမျှကို ကြည့်ခဲ့ပြီးစအချိန်သာဖြစ်နေတတ်သည်။ ထိုအချိန်သည်ကျွန်တော့်မျက်ဝနိ်းမှ မျက်ရည်တို့ ကျဆင်းနေဆဲအချိန်ဖြစ်သည်။
အချစ်က သေစေနိုင်သော အဆိပ် ဟူသည့် အဆိုထက် သဝန်တိုမှုက ပို၍ ပူလောင်ပြင်းပြသော အဆိပ်ဟု ဆိုချင်ပါသည်။ ထိုအချိန်တိုင်းဝယ် ကျွန်တော်သည် ရုတ်ချည်းလဲကျ၍ သေဆုံးချင်ပါသည်။ ငှက်ငယ်လေးနှင့် သူ့ငှက်ကလေးတို့ ပျော်ရွှင်ပုံများကို ကျွန်တော် မမြင်လိုပါ။
ကျွန်တော့် နှလုံးသားသည် နုလွန်းပါသည်။ ချစ်လွန်း၍များ ပို၍နုနယ်သွားလေသလား။
ကျေးဇူးပြု၍ ငှက်ငယ်လေး တေးဆိုပါ။
ကောင်းကင်မှ သဲ့သဲ့ကြားရသော အသံတို့ကို ငှက်ငယ်၏ တေးဆိုသံအဖြစ်နှင့် နားဆင်ကြည့်မိတော့ အလွမ်းတို့ပျောက်ကာ ကြည်နူးမိသွား၏။ သို့သော် စိတ်ကူးသည် စိတ်ကူးသာဖြစ်၍ လက်တွေ့ဝယ် ငှက်ငှယ်၏ တေးဆိုသံကို ကျွန်တော်မကြားရသေး။
လွမ်းသည် ငှက်ငယ်။ လွမ်းလွန်းလှသည်။
နှလုံးသားမှ ထုဆစ်သော ကဗျာတို့အား သယ်ဆောင်သွားသော ရော်ရွက်ဝါလေးတို့ကတော့ ဖြင့် တိမ်တို့ဆီ အရောက်သွားနိုင်ပါရဲ့လား။ ငှက်ငယ်လေး မြင်သွားပါရဲ့လား။
(၄)
ငှက်ငယ်သည် ဒီချိန်ဆို လိုအပ်သော အစာအာဟာရကို ဖြည့်တင်းနေလေမည်လား။ နေ့ခင်း ထမင်းစားချိန် ရောက်နေပြီဖြစ်သည်။ သို့မဟုတ် ကောင်းကင်တွင်သာ ပျံသန်းရင်း အစာအာဟာရ ဖြည့်ဆည်းဖို့ မေ့နေလေမည်လား။ ကျွန်တော်သတိပေးချင်လှသည်။ ငှက်ငယ် ကျေးဇူးပြု၍ ကျန်းမာရေးကို ဂရုစိုက်ပါ။
ငှက်ငယ်သည် ကျွန်တော့်စိတ်ကူးတို့ကို တစ်သက်လုံးအတွက် အပိုင်သိမ်းထားသူဖြစ်၏။ ကျွန်တော့်အခက်အလက်တို့ကို ကောင်းကင်သို့ထိုးထွက်ရန်ကြိုးစားမှုသည် ငှက်ငယ်လေးအား ထင်ထင်ရှာှးရားမြင်လိုခြင်းကြောင့် ဖြစ်သည်ဟု ဆိုလျှင်လည်း မမှားပါ။
ငှက်ငယ်လေး သိမည်မထင်သော ကျွန်တော့် အကြောင်းအရာတချို့အား ငှက်ငယ်လေးဆီသို့ ကဗျာတို့ပါးရင်းပြောကြည့်သည်။ ငှက်ငယ်လေးသည် ကျွန်တော့် ကဗျာရွက်ဝါတို့ကို မမြင်။ သူသည် အစဉ်ကျော်သွား၏။ရံဖန်ရံခါ ကြည့်သောကဗျာရွက်ဝါတို့ကိုလည်း သူအလေးမထား။
ကျွန်တော့် ခန္ဓာကိုယ်တွင်တော့ လက်ဖျံတို့ ဝါ၍ ရွက်စိမ်းတို့ တုန်းလုပြီဖြစ်၏။
(၅)
ငှက်ငယ်လေးသည် တေးဆိုတတ်သည် ဟူသည့် စကားကိုသာ  ထပ်ခါထပ်ခါဆိုချင်သည်။ မည်သို့ တေးဆိုတတ်သနည်းဆိုသော် ငှက်ငယ်လေးအား မုန်းသူမရှိလောက်အောင်ပင် တေးဆိုကောင်းလှသည်။ လူ့ဘောင်စကားသုံးရလျှင် ပီယဝါစာ ချစ်ဖွယ်စကားဆိုတတ်သူဟု သုံးရမည်ထင့်။ သို့သော် ကျွန်တော့်အမြင်တွင်မူ ငှက်ငယ်သည် တခါတရံဂျစ်ကန်ကန်နိုင်လွန်းလှသည်။
ငှက်ငယ်လေးသည် သူမကျေနပ်သည့်အရာတွေ့လျှင် သူကိုယ်တိုင်မသိလိုက်ပါပဲ နှုတ်ခမ်းစူသွားတတ်၏။ သူ့စကားသံတို့သည် တိတ်ဆိတ်သွားတတ်၏။ သူ့အပြုံးတို့သည် ခြောက်ကပ်သွားတတ်၏။  တခါတရံကျတော့ သူ့ကိုယ်သူ မသိလိုက်ပါပဲ ကြီးမြတ်သော နှလုံးသားရှိကြောင်းပြသတတ်၏။ သို့သော်သူကိုယ်တိုင်ကတော့ မထင်မှတ်ပဲ ပြုလုပ်လိုက်သောအပြုအမှုဟုသာ ဆိုတတ်သူဖြစ်၏။
ငှက်ငယ်သည် ထိုသို့ ရိုးရှင်းကြီးမြတ်သူ ဖြစ်သည်ဟု ဆိုချင်ပါသည်။
ထို့ကြောင့်ပင် ကျွန်တော်သည်ငှက်ငယ်အား စစ်မှန်သော ချစ်ခြင်းဖြင့် ချစ်မိသွားသည်မဟုတ်ပါလား။
(၆)
ငှက်ငယ်ကို ချစ်မိခြင်းတွင် လိုအင်ဆန္ဒမပါဘူးလားဟု မေးသော် ကျွန်တော် ရဲရဲတင်းတင်း ပြန်ဖြေပါမည်။ ပါသည်။ ငှက်ငယ်ကို ချစ်မိခြင်းတွင် လိုအင်ဆန္ဒမပါခဲ့သော်လည်း ချစ်ပြီးတွင်တော့ ငှက်ငယ်ထံမှ ချစ်ခြင်းကို မွတ်မွတ်သိပ်သိပ် လိုအပ်နေပါသည်။
ငှက်တစ်ကောင်သည် သစ်ပင်တစ်ပင်၏နှလုံးသားကို မြင်နိုင်စွမ်းရှိလေသလား။ ထိုပုစ္ဆာကို တစ်နေ့တော့ ကျွန်တော်အဖြေရှာကြည့်ပါဦးမည်။
ငှက်တစ်ကောင်ကို စွဲလန်းမိသည့်သစ်ပင်တွင် အပြစ်ရှိသည်ဟု အမိန့်ချမှတ်ပေးပါရန် တောစောင့်နတ်အား သစ်ပင်အပေါင်းတို့က ဝိုင်းဝန်းပြောဆိုကြသည်။ အပြစ်ပေးလျှင် ကျွန်တော် လက်ခံပါမည်။ ချစ်မိသော နှလုံးသားရှိ၍ အပြစ်ရှိသည်ဟု ဆိုလျှင်တော့ လက်မခံနိုင်ပါ။
ချစ်ခြင်းမှန်သမျှသည် အပြစ်ကင်းပါ၏။ သို့သော် ရိုးသားဖို့တော့ လိုလိမ့်မည်။ ကျွန်တော် ငှက်ငယ်ကို ရိုးသားစွာချစ်မိပါသည်။ ထို့အတွက် ကျွန်တော့်တွင် အပြစ်မရှိပါ။
(၇)
ယခု ကျွန်တော် ကြိုးစားနေပါသည်။အမြစ်တို့ကို မြေမှ ထုတ်၍ ကောင်းကင်ဆီသို့ ငှက်ငယ်နှင့် တူတူပျံသန်းရန် ကြိုးစားအားထုတ်နေပါသည်။ သို့သော် ငှက်ငယ်သည် ကျွန်တော့်ချစ်ခြင်းကို မသိသေး။ ကျွန်တော်သည်လည်း မြေပြင်မှ အမြစ်တို့ကို ဆွဲမထုတ်နိုင်သေး။ ကျွန်တော့် ကဗျာရွက်ဝါတို့ကတော့ဖြင့် ငှက်ငယ်ထံသို့ အသိပေးရန် လေလွှင့်လေပြီ။
ကျွန်တော့် လက်ဖျံဝါဝါတို့သည်လည်း ဆက်လက်ကြိုးစားရန် တိုက်တွန်းနေချေပြီ။
တစ်နေ့နေ့ တစ်ချိန်ချိန်တွင် ငှက်ငယ်နှင့် ကျွန်တော် ဆုံစည်းနိုင်ပါသည်။
ဆုံစည်းခွင့် ရှိပါလိမ့်မည်။
တစ်ခုတော့ ကမ္ဘာလောကကို တောင်းဆိုချင်သည်။ ထိုသို့ဆုံစည်းချိန်ဝယ် ကျွန်တော်၏ အသိစိတ်အား ခေတ္တလွှတ်ပေးရန်ပင် ဖြစ်၏။ သို့မှသာ ငှက်ငယ်နှင့် ကျွန်တော်၏ ဆုံစည်းခွင့်ကို မြင်နိုင်မည် မဟုတ်ပါလား။

ရည်ဝေ