အိပ်မက်များ စားသုံးခြင်း

            အိပ်မက် များ စားသုံးခြင်း

            အိပ်မက်ကို စားသုံးဖို့ ပြင်ဆင်နေပါသည်။ ထို့အတူ ရောင်းချဖို့ရာလည်း ပြင်ဆင်နေပါသည်။ ဝယ်ယူရန် စိတ်ဝင်စားပါက ဖုန်းနံပါတ် xxxxxxxx သို့ ဆက်သွယ်နိုင်ပါသည်။

            အိပ်မက်ကို စားသုံးမည်ဆိုသည့်စကားကို မယုံမကြည်မဖြစ်ပါနှင့်။ အလိုရှိလျှင် ဝယ်ယူလိုသူအိမ်ရှေ့မှောက်သို့ အိပ်မက်ကို အိမ်တိုင်ရာရောက် ပို့ဆောင်ပေးပါမည်။ ကျွန်တော် စားသုံးမည့် အိပ်မက်သည် ကျွန်တော်ကိုယ်တိုင် လိုအပ်၍ ဖြစ်တည်လာသော အိပ်မက်လည်း ဖြစ်နိုင်သလို မလိုအပ်ပဲ မျှော်လင့်ခြင်းကြောင့် ဖြစ်တည်လာသော အိပ်မက်လည်း ဖြစ်နိုင်ပါသည်။ သို့မဟုတ် အကြောင်းပြချက်မရှိပဲ ဖြစ်တည်လာသော အိပ်မက်လည်း ဖြစ်နိုင်ပါသေးသည်။ ကယောက်ကယက် ဆောင်းအိပ်မက် လည်း ဖြစ်နိုင်သေးသည်။ ထို့အတူ ရောင်းချမည့်အိပ်မက်သည်လည်း ကျွန်တော်၏ကိုယ်ပိုင်အိပ်မက်ပဲ ဖြစ်သည်။

            အိပ်မက်တစ်ခုရဖို့ ပေးဆပ်ဖို့ရာသည် အိပ်စက်ဖို့နှင့် အချိန်ပဲ လိုအပ်ပါသည်။ အိပ်မက်သည် မည်မျှပင် တာရှည်စေကာမူ လိုအပ်သည့်အချိန်ကတော့ နှစ်ခြိုက်စွာအိပ်စက်နေမည့်၊ သို့မဟုတ် နိုးတဝက်အိပ်တဝက် အခြေအနေ နှင့်အတူအချိန်တခဏတာသာလိုအပ်ပါသည်။ သို့သော် ရည်မှန်းချက် ပန်းတိုင်ဆိုသည့် အိပ်မက်တစ်ခုရဖို့ရာကတော့ ထက်သန်သည့် စိတ်ကူးနှင့်မျှော်လင့်ချက်တို့ပေါင်းစပ်မှသာ ဖြစ်ပေလိမ့်မည်။ ထိုပန်းတိုင်ဆိုသည့် အိပ်မက်ကိုတော့ မလျှော့သော ဇွဲ၊ လုံလဝီရိယတို့နှင့် ပေါင်းစပ်ပေးလျှင် လက်ဝယ်ရရှိနိုင်မည်ဖြစ်သည်။ တစ်ခုတော့ရှိသည်။ ဖြစ်တန်စွမ်းဆိုသည့် ကန့်သတ်ချက်ဘောင်ထဲမှာတော့အကျုံးဝင်ရပေမည်။

            ခွေးတစ်ကောင်၏ အိပ်မက်သည် အိပ်စက်ခြင်းအိပ်မက်၌ လူအဖြစ်သို့ရောက်ရှိနေနိုင်သော်လည်း ပန်းတိုင်ဆိုသည့် အိပ်မက်၌မူ သူသည် လူအဖြစ်သို့ ရောက်ရှိလိုခြင်းမရှိသင့်။ဘယ်သောအခါမှ ဖြစ်လာနိုင်မည်မဟုတ်သော၊ သို့မဟုတ် ကိုယ့်ဖြစ်တန်စွမ်းကို ကျော်လွန်တွေးတောထားသော အိပ်မက်များသည် အိပ်မက်အဆင့်၌သာရှိလျှက် လက်တွေ့ဘဝကို အကျိုးမပြုသည်ကတော့အမှန်ပင်ဖြစ်သည်။

            ကျွန်တော်တို့ဘဝဝယ် အိပ်မက်ပေါင်းများစွာ မက်ဖူးပါလိမ့်မည်။ ထို့အတူပင် အိပ်မက်ပေါင်းများစွာကို လွှင့်ပစ်ခဲ့ဖူးပါလိမ့်မည်။

(-)

            အိပ်မက်ကို စားသုံးဖို့ ပြင်ဆင်နေပါသည်။

            တည်ခင်းထားသော ထမင်းစားပွဲတွင် လွှင့်ပစ်ခဲ့သော အိပ်မက်များကို အစီအရီထပ်ထား၍ မလွှင့်ပစ်ရသေးသော အိပ်မက်များကို သူ့ဘေးဝယ် ထပ်ထားသည်။ ထို့အတူ လက်တွေ့ကျကျ ပိုင်ဆိုင်ခွင့်ရခဲ့သော အိပ်မက်များကိုလည်း ထပ်မံ စီထပ်ထားသည်။

            အိပ်မက်အဆင့်မှ တက်မလာခဲ့သော အိပ်မက်တို့ကတော့ စားပွဲဝိုင်းဘေးတွင် ကျကျနနရပ်လျှက် ကျွန်တော်စားသုံးမည့် အိပ်မက်ပုံကြီးကို လာငေးကြည့်နေကြသည်။ အိပ်စက်ခြင်းဖြင့် ဖြစ်တည်လာခဲ့သော ထိုအိပ်မက်တို့သည် လွှင့်ပစ်ခဲ့သော အိပ်မက်တို့ကိုလည်းကောင်း၊ မလွှင့်ပစ်ရသေးသော အိပ်မက်များကိုလည်းကောင်း၊ ပိုင်ဆိုင်ခဲ့သော အိပ်မက်များကိုလည်းကောင်း ဝေခွဲရခက်သောအကြည့်တို့နှင့် ငေးကြည့်နေကြသည်။

            ပထမဦးစွာ လက်တွေ့ကျကျပိုင်ဆိုင်ခွင့်ရခဲ့ သော အိပ်မက်များကို တစ်ခုချင်းစီ စားသုံးကြည့်မိ၏။ ချိုမြသည်။ မွှေးလွှန်းသည့် ရနံ့ရှိ၏။ အဓိက ကတော့ ပီတိတမျိုး ရင်ထဲသို့ စီးဆင်းသွားခြင်းပင်ဖြစ်သည်။ ဒီပီတိ၏ ကနဦးဖြစ်တည်မှုသည် အိပ်မက်တစ်ခုနှင့် ဇွဲ တို့သာ ဖြစ်သည်။ အိပ်မက်ကို အသက်သွင်းဖို့ ကြိုးစားလိုစိတ်နှင့် မလျှော့တမ်း ဆိုသည့် စိတ်လေးသာ မရှိခဲ့လျှင် ဒီပီတိကို ကျွန်တော်စားသုံးခွင့် မရှိတော့ပြီ။

            အိပ်မက်တစ်ခုချင်းစီမှ ရလာသော ပီတိအရှိန်သည် ပြင်းလွန်းလှ၏။ သို့သော် တစ်စုံတစ်ခုလိုအပ်နေသေးသည် ဟု ခံစားနေရသေးသည်။

            ဆယ်တန်းအောင်မြင်ဖို့ ဆိုသည့် အိပ်မက်သေးသေးလေး၏ ပီတိ၊ ဘွဲ့တစ်ခုရဖို့ဆိုသည့် အိပ်မက်သေးသေးလေး၏ ပီတိ။ ကိုယ်ပိုင်အလုပ်တစ်ခု ရရှိဖို့၊ ကိုယ်ရှာဖွေသည့်ပိုက်ဆံဖြင့် ကိုယ့်တာဝန်ကိုယ်ယူနိုင်ဖို့စသဖြင့်အိပ်မက်ပေါင်းများစွာမှ ပီတိဝယ် တစ်စုံတစ်ခုလိုအပ်နေသေးသည်။

(-)

ဒုတိယ မလွှင့်ပစ်ရသေးသော အိပ်မက်များစွာကို စားသုံးဖို့ပြင်ဆင်မိပြန်သည်။ တချို့က ဖြစ်တန်စွမ်းများတွင် အကျုံးဝင်၍ တချို့က လက်လှမ်းမမီနိုင်သော အိပ်မက်များဖြစ်နေသည်။ ကျွန်တော် သမ္မတကြီးဖြစ်ချင်လို့မရပါ။ သို့သော် ကျွန်တော့် အိပ်မက်တစ်ခုဝယ် ကျွန်တော် သမ္မတတစ်ယောက်ဖြစ်နေပြန်သည်။ တစ်နှစ်နှစ်နှစ်ကြာရုံနှင့် ပျက်မည့်လမ်းတို့အစား နှစ်နှစ်ဆယ်ကြာ တောင့်ခံနိုင်မည့် လမ်းမကြီးများ တည်ဆောက်ပေးချင်သည်။ အညာတစ်ဝိုက် လမ်းဘေးတွင် နွားကျောင်းဆိတ်ကျောင်း နေရသော ကလေးငယ်တို့ကို ဗီတိုအာဏာဖြင့် စာသင်ခန်းထဲသို့ ခေါ်မိချင်သည်။ တစ်အိမ်ထောင်လျှင် မိသားစုပိုင်အိမ်တစ်လုံး၊ တိုက်ခန်းတစ်ခန်းပိုင်ဆိုင်ဖို့ ကြိုးစားမည်။ စသဖြင့်မစားရဝခမန်းလေထဲ တိုက်အိမ်ဆောက်သည့် အိပ်မက်မျိုးကို လွှင့်ပစ်မှ ရပါမည်။

            နောက်အိပ်မက်တစ်ခုတွင် ကျွန်တော်သည် နိုင်ငံကျော်အဆိုတော်တစ်ဦး ဖြစ်ချင်လို့နေပြန်သည်။ ဒါသည်လည်း ဖြစ်တန်စွမ်းနည်းပါးလှသော မမီမကမ်း အိပ်မက်ပါပဲ။ လွှင့်ပစ်ဖို့စာရင်းထဲသာ ထည့်ရပေမည်။

            နောက်ထပ်အိပ်မက်တစ်ခုကတော့ ကျွန်တော်ကိုယ်တိုင် လိုချင်နေခဲ့သော၊ လိုအပ်နေသော အိပ်မက်တစ်ခုသာ ဖြစ်သည်။ ကိုယ်ပိုင်အိမ်တစ်လုံး ရရှိဖို့။ ဒီအိပ်မက်ကိုတော့ အိမ်ငှားဘဝနှင့် နေဖူးသူတိုင်း ကိုယ်ချင်းစာနိုင်မည်ထင်သည်။ ကျောတစ်ခင်းစာနေရာအတွက် သူတပါးကို မျက်နှာချိုသွေးခဲ့ဖူးသူတိုင်း ကိုယ်ချင်းစာနိုင်မည်ထင်ပါသည်။ ဒီအိပ်မက်သည် ကျွန်တော့်ဘဝတစ်ခုလုံးစာ ဖြတ်သန်းလာခဲ့သော အိပ်မက်ဖြစ်သည်။ ကိုယ်ပိုင်အိမ်ဆိုတာ တချိန်တုန်းကတော့ ရှိခဲဖူးတာပေါ့ကွယ် ဟူသည့် အမေပြောပြဖူးသည့် ခေတ်ဟောင်းပုံပြင်ကို ကျွန်တော် အသက်ပြန်သွင်းရမည်။ နောင်တစ်ချိန်ကျွန်တော့်မျိုးဆက်အတွက် ကိုယ်ပိုင်အိမ်ရှိတယ် ဆိုသည့် ထည်ဝါမှုမျိုး ရရှိခံစားစေ့ချင်သည်။ ဖြစ်တန်စွမ်းလည်း ၇၀ရာနှုန်းထိရောက်ရှိနေပြီဖြစ်သည်မို့ ဒီအိပ်မက်ကိုတော့ ဆက်အသက်သွင်းရပေမည်။

            မလွှင့်ပစ်ရသေးသော အိပ်မက်များစွာထဲဝယ် ကျွန်တော့်နှလုံးသားတို့ထိခိုက်ပွန်းပဲ့ခံပြီးမှ ဖြစ်တည်လာသော အိပ်မက်တို့ရှိသည်။ မာနနှင့် သိက္ခာတို့ကြောင့်ဖြစ်တည်လာသော အိပ်မက်တို့ရှိသည်။ တကယ်ပင်လိုအင်ဆန္ဒပြင်းပြလွန်းသောကြောင့် ဖြစ်တည်လာသော အိပ်မက်တို့ရှိသည်။ အကျိုးအကြောင်း ခွဲခြမ်းစိတ်ဖြာ၍ ဘဝကို ထောက်ပံ့ပေးနိုင်သည့် အိပ်မက်တချို့ကို ယူသည်။ နှလုံးသားအာဟာရကို ပြည့်စုံနိုင်သည့် အိပ်မက်တချို့ကိုယူသည်။ ဘဝကိုကော၊ စိတ်ကိုကော အာဟာရမပေးနိုင်သည့် အိပ်မက်မျိုးကိုတော့ ပစ်ပယ်လိုက်သည်။ အိပ်မက်တို့ကို ရွေးချယ်စားသုံးနေရသည်မှာ တနည်းတော့ ပျော်စရာကောင်းလာသည်။ ကျွန်တော့်အိပ်မက်တွေထဲဝယ် ကျွန်တော့်ဘဝအပိုင်းအစများရှိသည်။ ထိုအပိုင်းအစများကို နေရာလွဲ၍ ကောက်ယူနေရသည့်နှယ်ရှိသည်။ အားလုံးပြီးလျှင်တော့ တစစီ ဖြုတ်ထားသော ပန်းချီကားအပိုင်းအစများကို ပြန်ဆက်သည့် ဂျစ်ဆောကစားနည်းကဲ့သို့ပင် ပုံပေါ်လာပေမည်။

ဟူး ..။ အိပ်မက်တစ်ပုံသာ ကျန်တော့သည်။ လွှင့်ပစ်ခဲ့သည့်အိပ်မက်များ။ ထိုအိပ်မက်များထဲဝယ် ဘာတွေများရှိလေမလဲ။ လွှင့်ပစ်ခဲ့သည် ဟု မည်သို့ပင်ဆိုစေကာမူ ခြေရာတော့ ကျန်သေးသည်မဟုတ်ပါလား။

ပထမဆုံးအိပ်မက်။

            ဘယ်တော့မှ ရန်မဖြစ်သော ဖေဖေနှင့်မေမေကို လိုချင်ခဲ့သည်။ မျက်ရည်တို့ဖြင့် တားခဲ့ဖူးကြောင်းတော့ အမှတ်ရနေခဲ့သေးသည်။

ဒုတိယအိပ်မက်။

            အဖေနှင့်အမေ့အတွက် ပိုက်ဆံရှာပေးနိုင်သော သားတစ်ယောက်ဖြစ်ချင်ခဲ့သည်။ အိမ်ရှင်အဖြစ်ကို ပထမဆုံးလိုချင်တောင့်တမိခဲ့သည်။ ဒီချိန်မှာတော့ အမေ့ကို အဖေရိုက်တိုင်း အမေ့ရှေ့က ကာကာအရိုက်ခံပေးနိုင်သည့် သား အဆင့်သို့ရောက်ရှိပြီဖြစ်၏။

တတိယအိပ်မက်။

            ဆယ်တန်းကို အမှတ်နည်းနည်းနှင့်အောင်ချင်ခဲ့သည်။ အချိန်တွေ အမြန်ဆုံးကုန်ဆုံးစေချင်ခဲ့သည်။ ဆယ်တန်းမြန်မြန်အောင်၊ဘွဲ့မြန်မြန်ရ၊ အလုပ်မြန်မြန်ရ။ အမေနဲ့အဖေ့အတွက် အားတစ်ခု အလျှင်အမြန်ဖြစ်ပါစေ ဟူသည့်အတွေးနှင့်။

            စတုတ္ထအိပ်မက်။

            တချိန် အားလုံးကို ငုံ့ကြည့်နိုင်ရမယ် ဟူသည့် အိပ်မက်။ အိပ်မက်ထဲမှာပင် ငွေငွေငွေ ဟု အော်ရင်းလိုက်နေမိသည့်အဖြစ်ထိ ထိုအိပ်မက်ကို ရူးခဲ့သည်။

……..

………….

အိပ်မက်ပေါင်းများစွာ ကျော်လွန်ခဲ့ပါပြီ။ လွှင့်ပစ်ခဲ့သော အိပ်မက်များထဲဝယ် ကျွန်တော် စိတ်ဝင်စားခဲ့သော ကောင်မလေး၏ အချစ်ကို ရရှိရေးလည်း ပါသည်။ အစိုးရဝန်ထမ်းတစ်ယောက်အဖြစ် ရောက်ရှိရေး ပါသည်။ သာမန်ကားတစ်စီးပိုင်ဆိုင်ရေးပါသည်။ ကျွန်တော့်ကိုနားလည်ပေးနိုင်သော အမေနှင့်အဖေ ပါသည်။ နောက်……. တည်ငြိမ်အေးချမ်းသော မိသားစုဘဝလေး ပါသည်။

နောက်………..။

ကျွန်တော်စာရေးဆရာဖြစ်ချင်သည်။ ထို့အတူစာရေးဆရာမဖြစ်ချင်။ စာတစ်ပုဒ်ဖြင့် စာဖတ်သူအားလုံး၏ နှလုံးသားကို ဆွဲကိုင်သွားနိုင်သော စာရေးဆရာအဖြစ်ကို လေးစားမြတ်နိုးသည်။ ငွေမပိုင်ငွေမကိုင်နိုင်သော စာရေးဆရာအဖြစ်ကို မုန်းသည်။ ထို့ကြောင့် ကျွန်တော်ရေးသောစာများသည် ကိန်းဂဏန်းများသာ အဓိက များပြားခဲ့သည်။

ပိုင်ဆိုင်ခွင့်ရခဲ့သော ပီတိများမှ လိုအပ်နေသော တစ်စုံတစ်ရာကို ကျွန်တော်တွေ့ပါပြီ။ တွေ့လိုက်ပြီ ဖြစ်သည်။

ဘဝပေးအခြေအနေကြောင့် ဖြစ်ပေါ်လာရသော ပန်းတိုင်များဝယ် ကျွန်တော့်နှလုံးသားမှ လိုချင်တပ်မက်ခြင်းမရှိခဲ့သောကြောင့် ပြည့်စုံသော ပီတိကို မခံစားခဲ့ရ။ နှလုံးသားမှတောင်းဆိုသော ပန်းတိုင်မှန်သမျှ ကျွန်တော် ခေါင်းခါခဲ့သည်။ လွှင့်ပစ်ခဲ့သည်။ ဘဝ နှင့် ဦးနှောက် အချိုးချ၍ လက်ခံနိုင်သော အိပ်မက်တချို့ကိုသာ စိတ်တစ်ခုလုံးနှစ်၍ ကြိုးစားခဲ့သည်မဟုတ်ပါလား။

နောက်ဆုံးကျန်သော အိပ်မက်သည် ကျွန်တော့်နှလုံးသားမှ တောင့်တနေသော အိပ်မက်ဖြစ်သည်။ ထိုအိပ်မက်ကို အကောင်အထည်ဖော်ဖို့ရာ မဖြစ်မနေကြိုးစားရမည်။ သို့မှသာ နှလုံးသား၏ လိုအင်ကြောင့် ဖြစ်တည်လာသော အိပ်မက်သည် အဘယ်မျှ ချိုမွှေးလက်ဆက်သလဲ ဆိုသည့်ပီတိကို ခံစားရမည်မဟုတ်ပါလား။ ကျွန်တော့်နောက်ဆုံးအိပ်မက်ကိုတော့ မည်သူမျှ ထုတ်မပြနိုင်သေး။ လက်ဝယ် ပိုင်နိုင်စွာကိုင်နိုင်ပြီဆိုပါမှ ထိုအိပ်မက်ကို စားသုံးရင်း ပီတိတဝေဝေဖြင့် ပြောနိုင်ပေလိမ့်မည်။

ယခုအချိန်မှာတော့ ကျွန်တော့် နောက်ဆုံးအိပ်မက်သည် အိပ်မက်အဆင့်သာရှိသေးသည်။

(-)

အိပ်မက်များကို စားသုံးပြီးချေပြီ။ ရောင်းချဖို့ရာအိပ်မက်ကတော့ ယနေ့ည မက်လာမည့် အိပ်မက်သာဖြစ်သည်။ ဝယ်လိုက ဝယ်နိုင်ပါသည်။ စိတ်ဝင်စားလျှင် ဖုန်းနံပါတ်xxxxxxx- သို့ ဆက်၍ ဝယ်ယူနိုင်ပါသည်။

တစ်ခုတော့ သတိပေးလိုသည်။ အိပ်စက်ခြင်းအိပ်မက်ပဲဖြစ်ဖြစ်၊ ရည်မှန်းချက်ပန်းတိုင်ပဲဖြစ်ဖြစ် ကိုယ့်နှလုံးသား၊ ကိုယ့်စိတ်မှ ဖြစ်တည်လာသော အိပ်မက်သည်သာ ကိုယ်နှင့်အသက်ဆိုင်ဆုံး ဖြစ်သည်ကိုတော့ မှတ်ထားဖို့လိုပါသည်။ တပါးသူအိပ်မက်ကို အားကျနေခြင်းသည် ကိုယ့်အိပ်မက်တို့ပျောက်ဆုံးဖို့ရာ လမ်းစဖြစ်နေသည်မဟုတ်ပါလား။

>>>>>>>>>>>>>>>>>>>>>>>>>>>>>>>>>>>>>>>>>>>ရည်ဝေ(လင်းရောင်ခြည်)