အဇ္ဈတ္တ၏သားကောင်
တဆက်ဆတ်တုန်နေသည့်
လက်များဆီမှ တစ်စုံတစ်ခုကို တောင့်တနေကြောင်း အသိပေးနေသည်။ မဖြစ်ဖူးဟူသည့် အသိနှင့်
တားထားသော်ငြား လက်တို့ကတော့ တဆတ်ဆတ်တုန်နေဆဲ။
----+++ - -
ညှီနံ့နဲ့ ချိုရှငံကျိနေတဲ့
ဒီအရသာ ဆိုတာသေချာပါသည်။ လျှာဖျားမှတဆင့်စီးဝင်လာမှုနှင့်အတူ လူတစ်ကိုယ်လုံး
လေထဲမြောက်တက်နေသလိုထင်ရ၏။ တိမ်လွှာစီးနေသည့်အရသာဆိုသည်မှာ ဒါကိုခေါ်လေသလား။
သူမ
လိုချင်တပ်မက်ခဲ့သောအရာ။ ပိုပြီး ခက်နက်နက်လေးတူးဆွလိုက်တော့ လက်ဖျံမှ နာကျင်မှုက
အသည်းထိစိမ့်သွားရသည်။ သို့သော် သူမ မရပ်နိုင်။ ဒီအရသာကနေ ရုန်းမထွက်နိုင်။
လျှာဖျားမှအရသာသည် တစ်ကိုယ်လုံးရှိ အကြောများ စိမ့်သွားလောက်အောင်ကို ဆွဲဆောင်မှု
ပြင်းလွန်းလှသည်။ လုံလောက်သော ကျေနပ်နှစ်သိမ့်မှုတစ်ခုရသည်ထိ ဒီအရသာကို သူမ
ဆက်လက်သုံးဆောင်ရမည်။ နှလုံးမှ
အောင့်တက်လာခြင်းကြောင့် လက်ဖျံကို နှုတ်ခမ်းဝမှ ဖြုတ်လိုက်မိသည်။ လက်ဖျံမှ
နာကျင်မှုသည် နှလုံးထိ စီးဆင်းသွားလေသလား။ ဘာဖြစ်ဖြစ် ဒီနေ့အတွက်တော့ လက်ဖျံကို
အနားပေးသင့်နေပြီ။
လက်ဖျံမှ နာကျင်မှုသည် တစ်ကိုယ်လုံး
လွင့်တက်လုအောင်ထိ တက်ကြွနေသော စိတ်တို့ကို မထိန်းနိုင်။
လက်ဖျံကို
ပတ်တီးစည်းဖို့ရာကြည့်လိုက်တော့ လက်ဖျံတွင် သွားကိုက်ရာများသည် နေရာအနှံ့အပြား၌
ရှိနေပြီဖြစ်သည်။ ဒီအကျင့်ကို သူမ ရပ်သင့်ပြီဟု သတိပေးရင်း ပတ်တီးစည်းနေမိသည်။
သို့သော် သူမ စိတ်ကို သူမနိုင်ပါမည်လား ဆိုသည့် အတွေးကို တွေးမိတော့ လန့်သွားရသည်။
မဖြစ်၊ မဖြစ်ချေတော့။ သည်အကျင့်ကြီး ဖျောက်မှ ရတော့မည်။
ဒီအကျင့်နှင့် သူမ ရင်းနှီးမိသည်မှာ မကြာသေးပေမယ့် လက်ကတော့
သူ့ဒဏ်ရာတွေကို ပြသရင်း နားသင့်ပြီဟု အကြံပေးချေပြီ။
မျက်လုံးအစုံကို မှိတ်ရင်း
လျှာဖျားမှလက်ကျန်ကို အရသာ ခံနေမိသည်။ ထို့အတူ စိတ်တို့ကလည်း…….။
(၁)
“အာ့”
လက်ကို ကြည့်ရင်း စိတ်ညစ်သွားမိသည်။ ဒီလက်ကို ရှသွားလောက်အောင်ထိ
သူမ ရဲ့အတွေးတွေ ဘယ်ရောက်နေပါသလဲဟုလည်း ကိုယ့်ကိုယ်ကို စိတ်တိုရင်း လက်ကို ဖိဖို့ရာ အနီးအနားသို့ရှာကြည့်တော
လက်ခုစုတ်ကလွဲ၍ ဘာမျှမရှိ။ လက်ကို ဘေစင်တွင်ဆေး၍ ဖိလိုက်တော့ ထွက်လာသော အနီရဲရဲမဟုတ်သည့်
ပန်းရောင်ဖျော့ဖျော့သွေးစတို့ကိုကြည့်ရင်း သူမ နှုတ်ခမ်းခြင့် ဖိကိုက်ချင်လာသည်။ လက်ကို
နှုတ်ခမ်းသို့ တင်မိရင်း သွေးတို့ကို စုပ်ထုတ်လိုက်သည်။ ထို့နောက် မြေပြင်ပေါ်ထွေးချလိုက်တော့
မြေပြင်ဝယ် ပြန့်ကျဲသွားသည်က ပန်းနုရောင်တံတွေးစများ။
အိုး
နှမြောလိုက်တာ။
ကိုယ့်အတွေးကိုယ်
ထိတ်လန့်သွားရရင်း မြေပြင်မှ အကြည့်လွှဲလိုက်ရသည်။ ဘာကို နှမြောတာလဲဟု မသေချာစွာဖြင့်
ခဲတံဆက်ချွန်လိုက်သည်။ သို့သော် နှုတ်ခမ်းထက်ရှိအရသာခံ လျှာလေးကတော့ ချွဲကျိကျိငံတံတံ
အရသာလေးကို စွဲကျန်စွာဖြင့် ထပ်မံကာ လိုချင်နေသေးကြောင်း ပြောပြနေသလိုလို။ သတိတရ နှင့်
လက်မှ ဓါးရှရာကို ကြည့်လိုက်တော့ ဖြူဖျော့နေသည်မှာ ရှိသမျှသွေးတို့ အစုပ်ခံလိုက်ရသည့်ဟန်မျိုး။
“အော်
ငါ့ညီမရယ် ခဲတံချွန်ချင်တာများ ကိုကိုကြီးကို ချွန်ခိုင်းပေါ့ ခုတော့ လက်ထိသွားရပြီမလား
သွားသွား ပလာစတာသွားကပ်ချေ ခဲတံ ကိုကိုကြီးချွန်ထားလိုက်မယ်”
အနားကပ်ပြောလိုက်သည့်
ကိုကိုကြီးစကားသံကြောင့် အထိတ်တလန့်မော့ကြည့်လိုက်မိကာ ဆေးပစ္စည်းများထားသဘ့်အခန်းသို့
ပြေးသွားလိုက်မိသည်။ လက်မှ နာကျင်မှုနှင့်အတူ ရင်ထဲဝယ် တစ်စုံတစ်ရာကို ပါ ကျေနပ်နှစ်သိမ့်နေခဲ့သည်ကိုတော့
ကိုကိုကြီးအား မပြောပြဖြစ်ခဲ့။
--++----
မဟုတ်ဖူး။
မဆေးနဲ့လေ။ နှမြောဖို့ကောင်းလိုက်တဲ့ သွေးတွေ ရေနဲ့အတူ မျောသွားကြရရှာတယ်။
ဇော်ဇော့်လက်မှ
သွေးများဆေးနေသည်ကို ကြည့်ရင်း အတွေးတွေက သူမကို နှိပ်စက်လာသည်။ မခံနိုင်လွန်းစွာနှင့်
မျက်လုံးအစုံကိုမှိတ်လိုက်တော့ မျက်ဝန်းထဲပေါ်လာသည်က အနီရောင်။ အနီရင့်ရင့်အရောင်များ
ဟိုတစ်စဒီတစ်စ ပြန့်ကျဲလျှက်။ လက်မှ ဆစ်ခနဲနာကျင်သွားသလိုရှိ၏။ သတိဝင်၍ မျက်လုံးအစုံကို
ဖွင့်ကြည့်လိုက်တော့ တစ်နေ့က ဓါးရှသည့်အနာကို နှုတ်ခမ်းဝတွင်တေ့ကာ သွားဖြင့် ကိုက်ဖြတ်ဖို့ကြိုးစားနေခြင်းပင်။
အလန့်တကြားနှင့် လက်ကို ရုတ်လိုက်မိရင်း ဇော်ဇော့်ကိုကြည့်လိုက်တော့ ဇော်ဇော်နှင့်
သူ့သူငယ်ချင်းကဖြင့် ခြင်းလုံးပြန်ခတ်နေပြီဖြစ်သည်။ ခြင်းလုံးခတ်၍ လဲရာမှ ဇော်ဇော့်လက်ဝယ်
ကျောက်ခဲနဲ့ခြစ်မိကာ ဒဏ်ရာရသွားခြင်းဖြစ်သည်။ ကျောင်းမှ အပြန်လမ်းတစ်လျှောက်ဝယ် ကျောင်းကစားကွင်းအတွင်းမှ
ဇော်ဇော့်ဒဏ်ရာကိုသာ မြင်ယောင်နေမိသည်။ အနီရောင်။
ဖေဖေနှင့်
မေမေ့အခန်းဆီမှ လဲပြိုသံများနှင့်အတု ဆူညံလွန်းသည့်အသံများစွာ ထွက်ပေါ်လာခြင်းကြောင့်
နားနှစ်ဖက်ကို လက်ဖြင့် ဇွတ်အတင်းအုပ်ထားလိုက်မိသည်။ ကိုကိုကြီး ထွက်သွားပြီဖြစ်သည်။
ကိုကိုကြီးသည် သူမတို့နှင့် မနေ။ ပုသိမ်မှ အဖိုးအဖွားများနှင့်သာ သွားနေမည်ဟုဆိုကာ
ထွက်သွားခြင်းပင်ဖြစ်သည်။ မေမေ မတားခဲ့။ ဖေဖေကလည်း မတားခဲ့။ ညစဉ်ရန်ဖြစ်နေသော မေမေနှင့်ဖေဖေ့ကို
တစ်ညတွင် ကိုကိုကြီးဝင်ဆွဲ၍ ကိုကိုကြီးပါးတစ်ခြမ်း ရောင်ကိုင်းနေခဲ့ဖူးသည်။ ထိုနေ့မှစ၍
ကိုကိုကြီး ပုသိမ်သို့ ထွက်ခွာသွားခဲ့ခြင်းပင်။
မျက်ဝန်းအစုံကို
မှိတ်ရင်း အိပ်စက်ဖို့ကြိုးစားမိသည်။ သို့သော် မှိတ်ထားသည့် အမြင်လွှာတွင် ဇော်ဇော့်လက်ဖျံက
သွေးများရဲလျှက်ပေါ်လာသည်။ ခေါင်းကို ဆတ်ခနဲ ခါပစ်မိရင်း မျက်လုံးအစုံကို ဖွင့်လိုက်မှိတ်လိုက်လုပ်ကာ
အာရုံပြောင်းကြည့်သည်။ဖျတ်ခနဲဖျတ်ခနဲ ပေါ်လာသည်က အနီကွက်များ။ တလက်လက်တောက်ပနေသောအနီကွက်များ။
လျှာဖျားမှ စိမ့်ဆင်းလာသည့် ချဉ်တင်တင်အရသာကြောင့် ခံတွင်းချဉ်တယ်ဆိုဒါမျိုးများလားဟု
တွေးရင်း ရေထသောက်လိုက်သည်။ သို့သော် မပြေသေးသလိုလို။ ယောင်္ကျားလေးများ ခံတွင်းချဉ်လျှင်
ဆေးလိပ်သောက်ကြသည်ဟု ကြားဖူး၏။သူမ ကကော ခံတွင်းချဉ်ခြင်းပျောက်ဖို့ရာ ဘာလုပ်ရမည်လဲ။
မျက်ဝန်းအစုံက
စာကြည့်စားပွဲပေါ်မှ ခဲချွန်ဓါးလေးရှိရာသို့ ရောက်သွားသည်။
မဖြစ်သင့်ဘူး
ဟု အလန့်တကြားခေါင်းခါလိုက်မိရင်း စောင်ခြုံထဲသို့ တိုးဝင်လိုက်သည်။ သို့သော် မျက်ဝန်းအစုံသို့
လာရောက်နှောင့်ယှက်နေသည်က ခဲချွန်ဓါးတစ်ချောင်း။
----++++-----
(၂)
မေမေနှင့်ဖေဖေသည်လည်း ပုသိမ်ရှိ
ကိုကိုကြီးထံဝယ် သွားရောက်နေထိုင်ခဲ့ပြီဖြစ်သည်။ သူမကတော့ ဘွဲ့ရကတည်းက ရန်ကုန်တွင်
အဆောင်ငှားနေရင်းဖြင့်သာ ကျန်ရှိခဲ့၏။ ဒီအချိန်မှတော့ မေမေနှင့်ဖေဖေ့ကြားဝယ် ဆက်လက်ဝင်မပါလိုတော့။
အကြောင်းအရာမဲ့ ခေါင်းစဉ်မဲ့ ရန်ပွဲများကိုလည်း မကြားချင်တော့။ ထို့အတွက်ပင် ရန်ကုန်တွင်
ကျန်ရှိခဲ့ခြင်းပင်။
ညစဉ် အိပ်မက်များခြောက်လှန့်နေသည့်ကြားမှ
အနီရင့်ရင့်အိပ်မက်ကို သူမ မေ့လျော့နိုင်အောင် ကြိုးစားနိုင်ခဲ့သည်။ မျက်စိရှေ့ဝယ်
အနီနှင့်ပတ်သတ်သမျှ မည်သည့်အရာနှင့်မျှ မထိတွေ့မိအောင်ကြိုးစားနိုင်ခဲ့ပြီဖြစ်၏။ သို့သော်
အနီရောင်သည် သူမရှေ့သို့ တကျော့ပြန်ရောက်ရှိလာသောအခါ…………။
----+++---
“သွယ် ဒီနေ့ အလုပ်မနားဘူးလား နင် မနေ့ညက ဖျားနေလို့
နားမယ်ထင်လို့ ငါက မခေါ်ပဲ ထွက်လာခဲ့တာ”
“အစ်မသွယ်
ဒီနေ့ အလုပ်လာတာ နောက်ကျတယ်နော်”
အိအိနှင့်
သန့်ရှင်းရေး အလုပ်သမားလေးများ၏ နှုတ်ခွန်းဆက်သံကို ခေါင်းသာ ငြိတ်ပြနိုင်ရင်း ပြန်ပြုံးပြဖို့ကိုတော့
စိတ်မပါခဲ့။ ကိုယ့်အလုပ်ရှိရာ ကောင်တာဆီသို့သာ ခြေတို့ ဦးတည်နေမိရင်း။
ဘောက်ချာကို
လက်မှ ကျွမ်းကျင်စွာ ရေးနေသော်လည်း စိတ်က အလုပ်တွင်မရှိပြီ။ ကွန်ပြူတာမှ အလိုအလျောက်တွက်ထုတ်ပေးသော
ဆော့ဖ်ဝဲနှင့် ငွေရေစက် နှစ်ခု ကြောင့်သာ အလုပ်တို့ တိကျနေခြင်းဖြစ်သည်။ ရေနေမိသော
မှန်အချပ်ရေ တို့ကို ဘောက်ချာနှင့် ကိုက်ညီမညီ ပြန်စစ်ဆေးလိုက်သည်။ ထို့နောက် ဘောက်ချာကို
အိအိဆီလှမ်းပေးလိုက်ရင်း သူမ နောက်ထပ်ဝယ်ယူသူဆီသို့ လှည့်လိုက်စဉ် လက်ဖမိုးဆီမှ စူးခနဲ
ခံစားလိုက်ရသောကြောင့် လှည့်ကြည့်လိုက်တော့ လက်ဖမိုးဝယ် သွေးစို့နေသည်ကို တွေ့ရ၏။ မှန်ချပ်နှင့်ထိကာ
ရှသွားခြင်းသာ။
စို့တက်နေသည့်
သွေးစလေးတို့ကို ကြည့်ရင်း လှိုက်ခနဲ ခုန်တက်လာသော ပျော်ရွှင်မှုတို့ကို ထိန်းမရနိုင်ခဲ့။
ခြောက်သွေ့နေသော ခံစားချက်တို့သည် ရုတ်တရက် စိမ်းလန်းစိုပြည်လာသလိုထင်ရ၏။ မှန်ဆိုင်မှာ
သူမ အလုပ်ဝင်လာတာ လေးလနီးပါးရှိသော်ငြား တစ်ခါမျှ မှန်မရှဖူး။ မရှဖြစ်အောင် သတိထားခဲ့သည်။
ခုတော့ ထိုကဲ့သို့နေခဲ့ခြင်းသည်ပင် သူမ စိတ်၏နုပျိုမှုတို့ ပျောက်ဆုံးခြင်းအစဟု စွဲမှတ်လိုက်၏။
စိတ်ထဲမှ တဒိတ်ဒိတ်ခုန်လာသော ပျော်ရွှင်မှုနှင့်အတူ လက်ဆက်သည့်ရနံ့တို့ကို ရှုရှိုက်လိုက်၏။
“အစ်မသွယ်
ပလာစတာ”
ဝန်ထမ်းတစ်ယောက်ပေးလာသော
အနာကပ်ပလာစတာကိုယူရင်း ဝန်ထမ်းများနားနေခန်းဆီသို့ ထွက်လာလိုက်သည်။ အနောက်က ကျန်ခဲ့သူတို့ကတော
ထင်လိမ့်မည်။ ပလာစတာ ကပ်ရန် အနာကို သွားဆေးခြင်းဟု။ အနာကို သွားဆေးသည်ကတော့ဟုတ်ပါသည်။
သို့သော် ပလာစတာကပ်ရန်သီးသန့်တော့ မဟုတ်။
“သွယ်
သူဌေးခေါ်နေတယ် နင့်ကို”
အနောက်မှ
လှမ်းခေါ်လိုက်သော အသံကြောင့် လှည့်ကြည့်လိုက်တော့ အိအိ။ လာခဲ့မယ်ဟူသည့် သဘောနှင့် ခေါင်းဆတ်ပြလိုက်ပြီး
လုပ်လက်စအလုပ်ကို လက်စသတ်ရန်ပြင်လိုက်သည်။ မှန်ရှရာလေးကို ကွက်နေသော သွားရာလေးများကို
မမြင်ရန် ပလာစတာနောက်တစ်ခု လိုအပ်ပါသည်။ ဒီအချိန်မှာတော့ မနေ့ကတည်းက လိုအပ်နေသော တစ်စုံတစ်ရာသည်
သူမ ကိုယ်ထဲသို့ ခုန်ဆင်းကာ အားအင်တို့ ဖြည့်ဆည်းပေးလိုက်သလို ထင်ရ၏။ လှမ်းလိုက်သမျှ
ခြေလှမ်းတိုင်းသည် အားအင်တို့ အပြည့်လွန်နေလေမလားဟူသည့် အတွေးဖြင့် ခြေလှမ်းတို့ကို
သိမ်မွေ့မှုရှိအောင် အေးအေးသက်သာ လှမ်းလိုက်ရသည်။
“သမီး
သွယ်လေး နေကောင်းရဲ့လား ”
“ကောင်းပါတယ်
အန်တီ”
ပြန်ဖြေလိုက်သည့်
သူမ၏ အသံမှာ အားအင်အပြည့်ပါနေသည်ဟု သူမ ယုံကြည်သည်။
“အစ်မသွယ်လေးက
တစ်နေ့တစ်ခြားကြောက်ဖို့ကောင်းလာပြီ။ ပိန်ညှော်ဖြူဆုပ်နေတဲ့ မျက်နှာနဲ့ အလုပ်ကို ဘယ်လိုများလာပါလိမ့်
အစ်မအိအိကကော သူ့သူငယ်ချင်းကို နားဖို့မပြောဘူးလားမသိဘူး”
“အစ်မသွယ်လည်း
သနားပါတယ် သူ့အဖေနဲ့အမေက ပုသိမ်သွားတဲ့ လမ်းမှာတင် အက်ဆီးဒန့်နဲ့ ဆုံးသွားတာ မကြာသေးဘူးတဲ့
ဒါပေမဲ့ သူကလိုက်မသွားပဲ ရန်ကုန်မှာပဲ ကျန်နေပြီး အလုပ်ချည်းဖိလုပ်နေတယ် တော်တော်စိတ်ထောင်းကိုယ်ကြေဖြစ်နေတယ်ထင်တယ်”
နောက်နားဆီမှ
ကြားနေရသော စကားသံတို့ကို သူမ သရုပ်မခွဲတတ်။ ဘာအကြောင်းအရာကို ပြောနေတယ် ဆိုတာကိုပင်
တော်တော်နားထောင်ယူရ၏။ စိတ်ထောင်းကိုယ်ကြေဆိုသော စကားလောက်သာကြားရသည်မို့ ခေါင်းကို
ဆက်ခနဲခါယမ်းပစ်ရင်း အလုပ်လုပ်ဖို့ကြိုးစားလိုက်သည်။ ထိုအကြောင်းအရာကို စဉ်းစားဖို့ထက်
ဆက်ခနဲဆက်ခနဲ ကျဉ်တက်လာသော လက်မှ အနာက နာကျင်မှုကိုပြေလျော့စေလိုခြင်းမဟုတ်ပါပဲ လျှာဖျားမှ
တောင့်တမှုကို ပိုပြင်းထန်လာနေသည်မဟုတ်ပါလား။ ဒီနေ့သည် သူမအတွက်အားအင်တို့ ပိုပြည့်ဖြိုးနေသလို
ထင်ရ၏။ အကြောင်းအရာကို တကူးတက ရှာဖို့ရာမလိုတော့။ပလာစတာကပ်ထားသော လက်ဖမိုးလေးကြောင့်သာ
ဖြစ်သည်ဟု သူမ တစ်ထစ်ချ ယုံကြည်ပစ်လိုက်သည်။
(၃)
ကုထင်ထက်အိပ်နေသည့်
အိအိ၏ ကုပ်သားဖွေးဖွေးလေးအောက်မှ သွေးကြောစိမ်းများက သူမကို ညှို့ယူနေသလိုလို။ တစ်ချက်တစ်ချက်
တိုက်ခက်လာသည့် ပန်ကာမှလေကြောင့် အိအိ၏ ဆံပင်တိုနှံ့နှံ့လေးများက ကုပ်သားလေးထက်မှ ဝဲပျံသွားတိုင်း
ဖျတ်ခနဲ တွေ့လိုက်ရသည့် သွေးကြောစိမ်းလေးများမှ ပို၍ ခုန်လှုပ်နေသလိုထင်ရ၏။ လက်ထဲမှ
ဓါးဖြင့် ထိုသွေးကြောလေးကို ထိုးခွဲဖို့ပြင်လိုက်စဉ်ပင်….။
“အားးးးးးးးးး”
ဖျတ်ခနဲ
လန့်နိုးသွားမိသည်။ ရင်တစ်ခုလုံး ခြောက်သွေ့နေ၍ ရေတစ်ခွက်ကို အလျှင်အမြန်သောက်လိုက်ရသည်။
သူမတစ်ယောက်တည်းသာ ရှိသော အိပ်ခန်းလေးကတော့ အိမ်မြောင်စုတ်ထိုးသံမှလွဲ၍ တိတ်ဆိတ်ငြိမ်သက်နေဆဲ။
သူမ ဘာ့ကြောင့်များ နေ့ခင်းက အဖြစ်အပျက်ကို ပြန်မြင်မက်နေရပါသလဲ။ နေ့ခင်းက အိအိရဲ့
အခန်းဆီသို့သွားတုန်းက အိအိက အိပ်ချင်ယောင်ဆောင်ကာ သူမကို ခြောက်လန့်ခဲ့သည်။သို့သော်
သူမကို ဆက်လက် ခြောက်လန့်နေခဲ့တာက အိအိ၏ လည်ပင်းပေါ်မှ သွေးကြောမျှင်လေးများ။ ထိုသွေးကြောမျှင်လေးများကို
လက်ဖြင့်ကိုင်ကြည့်ဖို့ ကြိုးစားလိုက်စဉ်မှာပင် အိအိက ဝါးခနဲအော်ကာ ခြောက်လန့်လိုက်ခြင်းဖြစ်သည်။
လျှာဖျားမှ
ငံကျိကျိနှင့်ချိုရှညှီမြသော အရသာကို တောင့်တနေသလိုထင်ရ၏။ သတိတရဖြင့် လက်ကိုမကြည့်လိုက်တော့
ဓါးရှရာလေးက အနာကပ်ပလာစတာလေး ကပ်လျှက်သား။
ထိုမှတစ်ဆင့် လက်ကောက်ဝတ်ကို ကြည့်လိုက်မိတော့ လက်ကောက်ဝတ်မှ သွေးကြောစိမ်းမြမြလေးက
သူမ၏ စိတ်တို့ကိုမရိုးမရွဖြစ်စေပြန်သည်။ မဖြစ်သေး။ တစ်နေ့ကပင် သွားဖြင့် အသေအကျေကိုက်ခဲ့ပြီးပြီ။
အနည်းဆုံးတော့ တစ်ပတ်လောက်နားမှဖြစ်မည်။
“ကလင်
ကလင် ကလင် ကလင်”
နာရီအလမ်းပေးသံကြောင့်
နာရီကိုကြည့်မ်ိတော့ မနက် ခုနှစ်နာရီခွဲပြီဖြစ်သည်။ အိပ်ယာမှ ထရင်း အလုပ်သွားရန် ပြင်ဆင်လိုက်သည်။
ရေချိုးနေသည့် အချိန်မှာပင် မျက်ဝန်းတို့က လက်မှ အနာဆီသို့ မကြခဏအကြည့်ရောက်သွားသည်ကိုတော့
သူမ တားမရနိုင်။ သို့သော် လက်ကောက်ဝတ်မှ သွေးကြောစိမ်းစိမ်းလေးတို့ကိုတော့ မမြင်နိုင်အောင်
ရေချိုးခန်းမီးအရှိန်ဖြင့် တားထားနိုင်လိုက်ပါသည်။
(၄)
ကြည့်လက်စ
ဇာတ်လမ်းမှ သရဲကားကို ကြည့်ရင်း သူမ ကိုယ့်သွားကိုယ် ပြန်စမ်းကြည့်နေမိသည်။ သူမမှာကော
အစွယ်များရှိလျှင် ဘယ်လောက်ကောင်းလိမ့်မလဲ ဆိုသည့်အတွေးလေးကလည်း တဖျတ်ဖျတ်နှင့်။ စိုစွတ်နေတဲ့
အမှောင်တွေမှာ လျှောက်သွားဖို့ လင်းလက်တဲ့ မျက်ဝန်းတစ်စုံရှိလျှင် ဘယ်လောက်ကောင်းလိမ့်မလဲလေ
..။
“ဟိတ်”
နောက်နားဆီမှ
အသံကြောင့် လှည့်ကြည့်လိုက်တော့ အိအိ။ အဆောင်နေသူငယ်ချင်းဖြစ်သလို လောကတွင် သူငယ်ချင်းဟူ၍
တစ်ဦးတည်းသာရှိသည့် အိအိ။ အိကျီ င်္လက်ပြတ်လေးနှင့် အဆောင်နေရင်း ဘောင်းဘီတိုလေး ဝတ်ထားသည်မှာ
ချစ်စဖွယ်။
“အမယ်
သူက သရဲကားကြည့်နေတာကို ဒီခွေ ဖွင့်ကွာ ကိုရီးယားကားကြည့်ရအောင် ”
ပေးလာသည့်
ခွေကို ဖွင့်လိုက်ရင်း အခန်းမီးကို မှိန်လိုက်သည်။ ဝင်းလက်နေသည့် သွေးကြောများကို သူမမမြင်မတွေ့လို။
ကိုရီးယားဇာတ်လမ်းတွဲကလေးနောက် သူမ ပါ လိုက်ပါမိသွားသည်။ အိမ်ထောင်ရေးဇာတ်လမ်းကောင်းလေးကို
သူတို့မို့ရိုက်တတ်လွန်းသည်။
“ဘုက်”
ရုတ်တရက် ပေါင်ပေါ်သို့ ဘုတ်ခနဲကျလာသောအရာကြောင့်
ကြည့်လိုက်တော့ အိအိ။ သူမ ပေါင်ပေါ်သို့ ခေါင်းလေးဘေးတစ်စောင်းတင်ထားသလိုရှိ၏။ အိအိကို
အခန်းပြန်အိပ်ဟု ပြောရန်နှိုးဖို့ပြင်လိုက်စဉ် တစုံတစ်ရာက သူမကို ညှို့ယူသွားသည်။ ဆံပင်ကုပ်ဝဲလေးအောက်မှ
ကုပ်သားဖွေးဖွေးလေးများ။ ရုတ်တရက် သွားတို့မှ တစ်စုံတစ်ခုကို ဆာလောင်လာသလိုရှိ၏။ သူမ
ငတ်နေသည်။ ဟုတ်သည်။ သူမ ငတ်နေတာ ကြာပြီဖြစ်သည်။
တဆစ်ဆစ်ကိုက်ခဲလာသည့် လက်ကောက်ဝတ်ကြောင့်
သူမ လျှာဖျားမှ တစ်စုံတစ်ရာကို ပိုပိုတောင့်တလာသလိုလိုရှိ၏။ သူမ ဘာလုပ်ချင်နေတာလဲ။
မဖြစ်သင့်ဘူး ဟု တွေးရင်းဇွတ်အတင်းနှိုးရန်ပြင်လိုက်တော့ လက်က အိအိကုပ်သားလေးများဆီဝယ်
လူးလွန့်နေပြန်သည်။ သွားများယားယံခြင်းဝေဒနာကို ဘယ်လိုကုစားရမလဲလေ။ အနေရခက်စွာ အိအိကုပ်သားများဆီမှ
အကြည့်လွှဲလိုက်သည်။ သို့သော် ပြန်ကြည့်မိပြန်သည်။ ကိုကိုကြီး လက်တစ်ဖက်ကို သူမကိုက်ခဲ့သည်။
ကိုကိုကြီးမငို၊ မငိုခဲ့။ မေမေနှင့်ဖေဖေရန်ဖြစ်သည့်ညက ကိုကိုကြီး၏ လက်တစ်ဖက်ကို သူမ
ကိုက်ခဲ့ဖူးသည်။ ဖျက်ခနဲ သွေးစက်တို့ပြန့်ကျဲနေသော လက်တစ်ဖက်ကို အမြင်တွင်မြင်လိုက်ရတော့
လျှာဖျားက ပိုပိုယားယံလာသည်။ သို့သော် မျက်လုံးအစုံကို
မှိတ်ရင်း အိအိကို နှိုးဖို့ကြိုးစားလိုက်သည်။ သူမ အောင်မြင်ပါ့မလား ဟု ကိုယ့်ကိုယ်ကို
မယုံမရဲ။ အိအိကို နှိုးနိုင်ပါ့မလား။ သူမကိုယ်သူမ ကျရှုံးတော့မည်လေလား။
ရည်ဝေ(လင်းရောင်ခြည်)
