အိပ်မက်ကကြိုး

“အိပ်မက်ကကြိုး-ဝါ-

ပြေလျော့သွားသော ဆက်ထုံးတစ်ခု”

ဟာလာဟင်းလင်းမြေနေရာကို တိုင်စိုက်ထူပြီး အမိုးလေးတပ်ရုံမျှနှင့်ငါတော့ မိုးစိုမှာမဟုတ်တော့ဘူးဟူသည့် အတွေးသည် အနည်းငယ်များရူးကြောင်ကြောင်နိုင်လေမလား။ အမိုးလေးတပ်ပြီးပြီးချင်း ဘေးမှအုတ်စီလိုက်ရုံနှင့် ချောပင်မချောရပါသေးသော အကြမ်းထည်ကိုကြည့်ရင်း စိတ်လုံခြုံမှုအနည်းငယ်တိုးလာသည်ဟုဆိုလျှင် ရူးနေသည်ဟု ပြောကြမလား။ ထိုအကြမ်းထည်ကိုပင် အရှေ့တံခါးပေါက်နှင့် နောက်ဖေးပေါက်တပ်ဆင်ပြီးချိန်မှာတော့ လူနေ၍မဖြစ်သေးသော၊ ပစ္စည်းများရှင်းလင်းမပြီးသေးသော၊ အုတ်နံရံများကိုအချောပင်မသတ်ရသေးသော အခြေအနေမှာပင် ငါ ဒီအိမ်မှာနေလို့ရပြီဆိုသည့်အတွေးကို လွတ်လွတ်ကျွတ်ကျွတ်ကြီးတွေးလိုက်မိပြီဖြစ်သည်။

            ထိုအတွေးနှင့်အတူ တစစရုပ်လုံးပေါ်လာသော အိမ်လေးကိုကြည့်ရင်း       တစစခွဲခွာခဲ့ရသော အိမ်လေးတစ်လုံးကို အမှတ်ရသွားသည်။ ကျွန်မ တွင် ရည်မှန်းချက်ပန်းတိုင်ဟူသည့် အိပ်မက်တစ်ခုရှိခဲ့သည်။ လက်ရှိလည်း ရှိနေဆဲဖြစ်သည်။ ထိုအိပ်မက်ကို အိမ်မက်ဟုလည်း ခေါ်နိုင်ပါသည်။ ဟုတ်၏။ ကျွန်မတွင် အိမ်မက်ဟူသည့်အိပ်မက်တစ်လုံးရှိပါသည်။ ထိုအိပ်မက်တွင် ကိုယ်ပိုင်ဆိုသည့် နာမ်စားလေးသုံးနိုင်သော အိမ်လေးတစ်လုံးသာပါသည်ဆိုလျှင် ရိုးစင်းလွန်းအားကြီးနေလေမည်လား။ သို့သော်အမှန်တကယ်ပင် ရိုးစင်းသန့်စင်စွာ မက်ခဲ့သော အိပ်မက်မှာ အိမ်လေးတစ်လုံးသာဖြစ်သည်။

            ထိုအိမ်လေးသည် လတိုင်းအိမ်ငှားခအတွက် မပူရသော အိမ်လေးတစ်လုံးဖြစ်ရမည်။ ရေစက်ကိုယ်ပိုင်ရှိရမည်။ သို့မှသာ ရေဝယ်ရသောဒုက္ခမှ ကင်းလွတ်ပေလိမ့်မည်။ အမေ၊ အဖေ၊ အစ်ကိုနှစ်ယောက်နှင့် ကျွန်မ မိသားစုဝင်ငါးဦးလွတ်လပ်စွာနေထိုင်နိုင်သည့် အကျယ်အဝန်းရှိရမည်။ထို့ပြင် ထိုအိမ်တွင် ကျွန်မအတွက် မိန်းကလေးခန်းသီးသန့်ပါရမည်။ ရေချိုးခန်းသီးသန့်လည်းပါစေချင်သည်။ အိမ်ရှေ့ဝယ် ဧည့်သည်လာလျှင် ဧည့်ခံနိုင်စေရန် ကျယ်ဝန်းစွာရှိရမည်။ ခြံစည်းရိုးများကိုတော့ လုံခြုံစွာကာရံထားစေချင်သည်။ အိမ်ဘေးပတ်လည်ဝယ် ပန်းပင်တို့စိုက်ရန်မြေနေရာလွတ်လေး ရှိစေချင်သည်။သို့မှသာသစ်ပင် စိုက်ပျိုးနိုင်မည်ဖြစ်သည်။

            ကျွန်မ ၏အိပ်မက်ဖြစ်သော အိမ်လေးသည် ကြီးကျယ်ခမ်းနားစရာမလိုပါ။ ကျွန်မလိုအပ်သည့် အချက်အလက်သေးသေးလေးများနှင့်သာ ကိုက်ညီရန်လိုအပ်ပါသည်။ ထို့အတွက် အိမ်မက်ဟူသည့်အိပ်မက်က ရိုးစင်းသလို အိမ်လေးကလည်း ရိုးစင်းလှပါသည်။ ထိုကဲ့သို့ ရိုးစင်းသော အိပ်မက်တစ်ခုကို ကျွန်မ ဘဝနှင့်ချီ မက်ခဲ့ရသည်။ ဘဝနှင့်ချီ မက်ခဲ့သော်လည်း အိပ်မက် ဖြစ်တည်လာပုံက မဆန်းပြားခဲ့။

            ကျွန်မ၏ငယ်ဘဝမှ စတင်ဖြစ်တည်ခဲ့သည်။

+++++++++++++-------------------------------++++++++++++++++++

            အနောက်တွင် စံပယ်ပင်များစိုက်ပျိုးထား၍ ခြံစည်းရိုးတစ်ဝိုက် ဝါပင်များစိုက်ထားသောအိမ်လေးတစ်လုံး ကျွန်မတွင် ရှိခဲ့ဖူးသည်။ အိမ်လေး၏ ယာဘက်တွင် ဇီးပင်များစိုက်ပျိုးထားပြီး ဝဲဘက်တွင်မူ သနပ်ခါးပင်များက နေရာယူထားသည်။ စံပယ်ခင်းတစ်လျှောက်သွားသောလမ်းလေးသည် ဝဲဘက်မှသွားလျှင် သနပ်ခါးပင်တို့မှရနံ့များကြောင့် တိမ်းမူးဖွယ်ရာ သာယာလွန်းလှသည်။ ထို့အတူညာဘက်မှသွားလျှင်လည်း ဇီးပင်တို့မှ ရနံ့တို့ကြောင့် သာယာကြည်နူးဖို့ကောင်းပြန်ပါသည်။

            ထိုအိမ်လေးကို ခွဲခွါခဲ့ရစဉ်က မှတ်မှတ်ရရသမဝါယမလုပ်သားများ အောက်ဆိုဒ်ရမှ နေရထိုင်ရသက်သာသော၊ချောင်ချိသောခေတ်ဖြစ်သည်။ အမေကောအဖေပါသမဝန်ထမ်းများဖြစ်နေသည့်အခါ၊ အဖေကောအမေပါ တစ်လမ်းမောင်းစနစ်သာ ကျွမ်းကျင်ကြသည့်အခါ နောက်ဆုံးတွင် ကျူးတဲအဖြစ်မှ ကိုယ်ပိုင်အိမ်အဖြစ်ပါမစ်အပြည့်အစုံရပြီဖြစ်သော မြေကို ရောင်းချခဲ့ရတော့သည်။

            ထိုအိမ်တည်ရှိရာမြေကွက်ကိုရောက်စဉ်က ကျွန်မသည် ဘာကိုမှ သိနားလည်ခြင်းမရှိသော အရွယ်ဖြစ်သည်။ ကားကြီးတစ်စီးနှင့် ပစ္စည်းတွေတင်လာသည်။ ထို့နောက် တောင်ကုန်းတစ်ခုကိုပြ၍ ဒီနေရာမှာ ငါတို့နေရမှာ ဟုအမေ့ကိုပြောနေသည့် အဖေ့အသံကိုကြားရသည်။ ပစ္စည်းတွေချအပြီးမှာတော့ ကားကြီးက လက်ပြနှုတ်ဆက်သွားသလို ကျွန်မတို့မိသားစုလည်း ထိုတောင်ကုန်းလေးတွင်ကျန်ခဲ့တော့သည်။ ပထမဆုံးရောက်စနေ့မှာတော့ အဖေပြုလုပ်သည်က အစ်ကိုနှစ်ယောက်နှင့်အတူ လူနေသာရုံတဲလေးဆောက်ခြင်းသာဖြစ်သည်။ ညပိုင်းတွင် အအေးကဲလွန်းသဖြင့် အမေနှင့်အဖေ့ကြားဝယ် ခွေနေအောင်ကွေးရင်း ဘယ်သရဲများ လက်ကိုလာဆွဲမလဲဟု စောင်ခြုံအောက်မှ ကြောက်ခဲ့ဖူးသည်။ ထိုကဲ့သို့ကြောက်ရင်းနှင့်ပင် ထိုတဲလေးဝယ် ရက်နှစ်ဆယ်ကျော်ကျော်နေခဲ့ရဖူးသည်။

            လက်သမားဆရာကို ခေါ်ကာ အဖေက အစ်ကိုနှစ်ယောက်နှင့်အတူ အိမ်တစ်လုံးဆောက်လုပ်ပြီးချိန်မှာတော့ ဒါငါတို့အိမ်ကြီး ဆိုသည့်အသိထက် လုံခြုံစွာ အိပ်ခွင့်ရပြီဟူသည့်အသိဖြင့် ပျော်ခဲ့ရဖူးသည်။ သို့သော် ထိုအိမ်လေးကို ကျွန်မအသက် ၁၂ နှစ်အရွယ်တွင်စွန့်လွှတ်ခဲ့ရသည်။

            သိနားလည်နိုင်သော အသက်အရွယ်ဟု ခေါ်ဆိုနိုင်သော၊ သို့မဟုတ် မသိနားမလည်ခြင်းများလည်း ပြည့်နှက်နေသေးသော အသက်၁၂နှစ်အရွယ်မှာပင် ကျွန်မ ထိုအိမ်လေးကို စွန့်လွှတ်ခဲ့ရသည်။ ထိုအိမ်လေးကိုဆုံးရှုံးရစဉ်က မှတ်မှတ်ရရ ကျွန်မ ငိုခဲ့ဖူးသည်။ ဟုတ်၏။ ရှိုက်ကြီးတငင်မငိုမိသော်ငြား အမေနှင့်အဖေမသိအောင် တိတ်တိတ်လေးမျက်ရည်ကျခဲ့ရသည်။ အမေနှင့်အဖေ့မျက်ဝန်းတို့သည်လည်း နီရဲနေသည်ကိုတော့ မှတ်မှတ်ထင်ထင် ရှိခဲ့ပြန်သည်။

            ---------------++++++++++++++------------------+++++++++++++++-------

            ရန်ကုန်မြို့ကြီးကို ယောင်လည်လည်ရောက်လာသော မိသားစုတစ်စု။ နေတော့ ဌာနကအဆောင်လေးမှာ။ ရန်ကုန်မြို့သူမြို့သားများကြား ရန်ကုန်ပါးမဝသေးတော့ အထင်သေးအမြင်သေးခံရသည့်အပြင် ရှုတ်ချခံရသည်။ ဌာနမှူး ရှိသည့်အချိန်ဆို ဌာနတွင်ကပ်ရပ်နေထိုင်သော မိသားစုမှ ကလေးငယ်များ အပြင်လုံးဝမထွက်ရ။ မီးသုံး-သုံးပြန်သည်။ ရေတင်-တင်ပြန်သည်။ ယုတ်စွအဆုံး ရေအိမ်သုံးချင်လျှင်ပင် ရုံးဆင်းသည့်အချိန်ထိ အောင့်အည်းသည်းခံရသည်။ မျက်နှာငယ်လွန်းလှသော ကျောင်းသွားကျောင်းပြန်အချိန်များကိုလည်း မမေ့သေး။ ကျောင်းအဖြူအစိမ်းဝတ်သူကို မမြင်ဖူးကြသူများကဲ့သို့ အိမ်ခန်းထဲမှထွက်သည်နှင့် ဝန်ထမ်းများက ငေးစိုက်ကြည့်နေကြသည်မှာ ရုံးဝန်းအပြင်ရောက်သည်ထိပင်။ သက်ပြင်းကိုပင် ရုံးဝန်းအပြင်ရောက်မှ ရဲရဲချရဲခဲ့သည်။ ထို့ကြောင့်ပင် ကျွန်မ အိမ်မက်သည့် အိပ်မက်ကိုများ မက်ခဲ့လေသလား။

            ဘဝဆိုသည်မှာ တဖြောင့်တည်းမသွားတတ်ကြောင်း သင်ကြားခဲ့ရသည်။ ဌာနတွင် ဝန်ထမ်းမိသားစုများ နေထိုင်သည်ကိုလက်မခံပါ ဆိုသည့်တိုင်စာဖြင့်အမေနှင့်အဖေသည် အိမ်ငှားနိုင်အောင် ကြိုးစားရပြန်သည်။             ဘဝအချိုးအကွေ့လေးတွေက လက်ဆောင်ပေးသော ခဲလုံးလေးများသည် ကျွန်မစိတ်ထဲဝယ် ခုထိ စွဲကျန်နေဆြဲဖစ်သည်။ အိမ်ငှားခ ခြောက်လစာကို ၃လစာသာ ကြိုတင်ပေးရဖို့ အမေနှင့်အဖေ့တို့ အောက်ကျို့တောင်းပန်ခဲ့ရပုံကို  မျက်လုံးထဲကမထွက်သေး။ အိမ်ငှားခအနည်းဆုံးကို ရှာဖို့ အမေနှင့်ကျွန်မ ခြေတိုအောင် လမ်းလျှောက်ခဲ့ရတာ မမေ့သေး။ မီတာခဆောင်ရတော့မည်ဆိုလျှင် သူ့မီတာစာရွက်ပါ ရောယောင်ထည့်ပေးတတ်သော အိမ်ရှင်များကိုလည်း မမေ့သေး။ ကျွန်မ အိမ်မက်သည့် အိပ်မက်ကို ငယ်ဘဝကတည်းက တည်ဆောက်မိခဲ့သည်။

            ယခု ကျွန်မ၏ငယ်ဘဝအိပ်မက်များထဲမှ အိပ်မက်တစ်ခုသည် ကကွက်အစုံအလင်ဖြင့် ကျွန်မနှလုံးသားအတွင်းသို့ ကြည်နူးပီတိများ ဝင်ရောက်လာစေပြီဖြစ်သည်။ မိဘနှစ်ပါးနှင့် လူလွတ်ကျွန်မသာ ကျန်တော့သော မိသားစုအတွက် နေထိုင်ရာအိမ်လေးတည်ဆောက်နိုင်တော့မည်ဖြစ်သည်။

            ကံကောင်းထောက်မ၍ ရလာသော အကျိုးခံစားခွင့်ဟု မဆိုချင်ပါ။ ဒီအိပ်မက်အတွက် နေ့ရှိသရွေ့ ကြိုးစားခဲ့ရတာ ဖြစ်သည်။ ဒီအိပ်မက်အတွက်ပဲ ညရှိသရွေ့ကြိုးစားခဲ့ရတာ ဖြစ်သည်။ ဒီအိပ်မက်အတွက်ပဲ ကျွန်မ အသက်ရှင်နေခဲ့သည်ဟုတော့ မဆိုလိုချင်ပါ။ သို့သော် ဒီအိပ်မက်ကြောင့်ပဲ ကျွန်မ ဘဝကို ရင်ဆိုင်ဖို့ အားအင်ရခဲ့တာ ဖြစ်သည်။

            လွန်ခဲ့သော ခြောက်နှစ်။ ကုမ္ပဏီများမှ မလိုချင်သော သာမန်ဘွဲ့တစ်ခုကို ပိုင်ဆိုင်ခဲ့သည်။ အလုပ်လျှောက်ဖို့ရာလည်း သာမန်အစိုးရဝန်ထမ်းအဖြစ်ကိုပဲပြေးလုလုပ်ရတော့မလိုလို၊ တစ်လ ခြောက်သောင်းသာရသော စာရေးမနေရာ ပြေးလုရတော့မလိုလို ဖြင့် ကျွန်မဆိုသည့် မိန်းကလေးတစ်ယောက် ယောင်ချာချာဖြစ်ခဲ့ရသည်။ တိုက်ဆိုင်စွာပင် အဖေ့ပင်စင်မှ ငွေခြောက်သိန်းတိတိရသည့်အခါ အဖေ့ယုံကြည်ချက်ဖြင့် ကျွန်မ ကိုယ်ပိုင် အပ်ချုပ်ဆိုင်တစ်ဆိုင် ဖွင့်နိုင်ခဲ့တာဖြစ်သည်။ နေ့မအားညမအား ဆိုသည့်စကားကို မသုံးလိုပါ။ နေ့မအိပ်ညမအိပ် ဆိုသည့် စကားကို မသုံးလိုပါ။ သို့သော် အစွမ်းရှိသလောက် ကြိုးစားခဲ့သည်ဟု ကိုယ့်ကြိုးစားမှုကို မဏ္ဍပ်တိုင် တက်ပြလိုက်ချင်သည်။

            ယခုကျွန်မ၏ အိမ်လေးသည် မကြီးကျယ်မခမ်းနားသော နေရာလေးတွင် တည်ရှိပါသည်။ ငယ်ဘဝနှင့်ခြားနားသည်ကတော့ ငယ်စဉ်က ရှုရှိုက်ခဲ့ရသော စံပယ်ရနံ့များ၊ သနပ်ခါးရနံ့များ၊ ဇီးသီးပင်တို့၏ ရနံ့များဖြင့် ကျွန်မ၏ ခြံဝန်းကို အလှမဆင်နိုင်တော့။ ၁၀ပေသာ ကျယ်သော အိမ်လေးဝယ် ကျွန်မနှင့် မိဘနှစ်ပါးအတွက်တော့ အိပ်စရာနေရာအစုံအလင်ရပြီဖြစ်သည်။ ကိုယ်ပိုင်အိမ်ဆိုသော အထူးပြုပုဒ်ကို ပိုင်ဆိုင်လိုက်ရပြီဖြစ်သည်။ ရေကတော့ ဆက်လက်ဝယ်သုံးရဦးမှာပင်ဖြစ်၍ တစ်ခုကောင်းတာကတော့ ရေအိမ်တက်လျှင် သူများမျက်နှာကို ကြည့်စရာမလိုတော့တာဖြစ်သည်။

            ကျွန်မအတွက်လည်း ကိုယ်ပိုင်အိပ်ခန်းလေးတစ်ခုရရှိပြီဖြစ်၏။ နံရံတို့အချောမသတ်ရသေးသော အိပ်ခန်းလေးအားကြည့်ရင်း ကျွန်မမျက်ဝန်းကို တဖျတ်ဖျတ်ခပ်လိုက်မိသည်။ ဘေးမှ ရပ်ကြည့်နေသော အမေနှင့် အဖေ့မျက်ဝန်းတို့သည်လည်း နီရဲနေသည်ကို တွေ့ရသည်။ ဘာ့ကြောင့်လဲဟု ကျွန်မ မမေးမိတော့။ ကျွန်မဘဝဝယ် ဒီအိမ်လေး ပြီးသည့်နေ့မှာပင် သေလိုက သေနိုင်ပြီဟု ဆိုလျှင် အပိုမဟုတ်ကြောင်းကိုတော့ ဘဝတစ်ခုလုံးရင်းပြီးမက်ခဲ့ရသည့် အိပ်မက်လေး၊ အိမ်မက်လေး နားလည်နိုင်ပါလိမ့်မည်။

            သိပ်မကြာခင် ကျွန်မတို့မိသားစု နေထိုင်ရတော့မည့် အိမ်လေးကတော့ဖြင့် ကျွန်မတို့ မိသားစုသုံးယောက်ကို ပြုံးပြနေသလိုလို။ စိတ်ထဲမှ ကြိုးထုံးလေးတစ်ခုသည်လည်း ပြေလျော့သွားသလိုလို။ ကကွက်အစုံအလင်ဖြင့် လက်ဝယ်ပိုင်ဆိုင်ရတော့မည့် အိပ်မက်လေးအတွက် အထပ်ထပ်ကြိုးစားခြင်းတို့ ဖြည့်ဆည်းရဦးမည်ဖြစ်သလို နောက်အိပ်မက်များစွာအတွက်လည်း မပြေသေးသည့် ဆက်ထုံးများစွာကို ဖြေလျော့ဖို့ရာ ကျွန်မ ကြိုးစားရပါဦးမည်။ ငယ်ဘဝအိပ်မက်များစွာမှ မဖြစ်ထွန်းနိုင်တော့သည့် အိပ်မက်တို့ကို လွှတ်ပစ်ရင်း ဖြစ်ထွန်းနိုင်လာမည့် အိပ်မက်များစွာအတွက် ကြိုးစားခြင်းနှင့် ရုန်းကန်ခြင်းအစာကို ကျွေးမွေးပြုစုရပါဦးမည်။ 

ရည်ဝေ(လင်းရောင်ခြည်)